Alice in Borderland ye una serie d’acción real de Netflix, basada nel manga homónimu d’Asō Haro (Zom 100), que vivió una segunda mocedá, quiciabes mayor que na estrena, tres l’ésitu de Squid’s Game. Le xente quedara con ganes de ver más “survival games” asiáticos y alcontraron nesta la manera de satisfacer la nagua.
Por embargu, tres les dos temporaes nes que s’algamaba’l final de la obra qu’adaptaba, mui pocos apostaben porque la serie siguiera, pero esti ésitu paez qu’afaló a la productora a decidise por sacar una tercer parte, talamente como podemos descifrar del cartelu de promoción que vos dexamos embaxo (y que, si sustityimos cada carta pola lletra correspondiente, diz Alice Three). Nun vamos contar spoilers, pero si vistis la serie la verdá que nun resulta cenciello saber qué van inventar… sicasí, seya una bona o mala idea, ta claro que los fans vamos echar una güeyada pola curiosidá y con ganes de que consigan enganchanos.
Alice in Borderland trata sobre un grupu d’amigos que, de sópitu, alcuéntrense solos en Tokio, paez que desapaez tol mundu menos ellos. Por embargu, cuando alcuentren xente ye pa descubrir que, pa siguir sobreviviendo, han participar nunos xuegos macabros nos que-yos ponen trampes mortales o que consisten n’asesinase unos a otros. Asina, mientres xueguen, atopen aliaos y intenten investigar ónde tán daveres y qué ye lo que ta pasando. ¿Estraterrestres, realidá virtual…? Hai que ver la serie (o lleer el manga) pa enterase.
