Nos últimos años tán faciéndose bastante populares los llamaos “fanfilms“, películes de personaxes conocíos pero que faen persones ensin llicencia pa ello, lo que nun da problema mientres nun lleven ganancies con ello. Asina, quiciabes namás por amor a les sagues o pueque tamién por consiguir dalgo de fama, hai xente que fai auténtiques obres maestres anque manexen recursos bien modestos, y darréu xúbenles a Internet pa que se puean ver de baldre.
Una que tuvo causando bastante espectación, tanto que los retrasos na estrena punxeron a prueba los nervios de los aficionaos, ye la acabante salir Spider-Man: Lotus, que magar tener un presupuestu modestu emociona polo bien fecho que ye too (podría pasar por una película “direuta a vidéu). Con dos hores de duramientu, de manera bultable recuerda en dellos elementos estéticos a la primer película de Sam Raimi, mientres que’l so argumentu ta bien fundamentáu nos cómics, y ye que se basa na muerte de Gwen Stacy (asocedía en The Amazing Spider-Man #121) y l’estáu d’animu inmediatamente posterior de Peter Parker, tamién na mítica hestoria na que l’Home-Araña cumple’l deséu d’un neñu enfermu y desvéla-y la so identidá secreta (#248), y amás na serie curtia Spider-Man: Blue (2002), na que se vuelven a revisitar los años mozos del personaxe.
Sicasí, la película nun ta llibre de polémica, y ye que se revelaron unos mensaxes privaos ente’l direutor y guionista Gavin J. Konop y el tamién guionista y actor (interpreta a Harry Osborn) Sean Thomas Reid, y nos que s’alcuentren comentarios racistes de bastante mal gustu. Magar les disculpes, esti fechu fai que dalgunos empiecen a denomar Spider-Man: Lotus “la película racista de Spider-Man”.
Sicasí, pensamos que ye un esfuerciu escomanáu con una pinta tremenda, y anque tovía nun tuvimos tiempu de vela (estrenáronla va namás unes hores) dexámosvos l’enllaz a la película calcando equí, pa que la esfrutéis si vos peta.
