Hai quien diz que Marvel atinó cuando tomó la decisión más polémica de la historia al respective de Spider-Man, allá per 2006. Consideraben que los personaxes casaos yeren “más aburríos”, y eso foi lo que llevó a “descasar” a Peter y Mary Jane. Y si dicimos “descasar” ye porque nun los ficieron divorciase, sinón que, por efectu de la maxa, nun pactu col diañu Mefisto pa qu’esti salvara a la tía May, borróse de la continuidá que dalguna vegada casaren.

Eso traxo una bona etapa pal trepamuries, el Brand New Day, que se llamó, pero munchos llectores sintiéronse traicionaos y nun fueron pocos los que dexaron de comprar les sos series. En dalguna ocasión faen como que van volver a axuntalos, llueu resulta que non, o non dafechu, y hasta crearon un universu paralelu, el de les series Renew Your Vows, namás pa trayer a la pareya de nueves criando a la fía ensin “mefistazu” pel mediu.

Agora, coles colecciones qu’anoven l’Universu Ultimate (esto ye, un Universu Marvel distintu, nel que muestren versiones nueves de personaxes clásicos) llega un plantegamientu pa Spider-Man que guardaben como un gran secretu hasta l’últimu momentu, y que pue prestar muncho a los que s’enfadaron naquella. Y ye que la serie nueva del arácnidu ta protagonizada pol Peter Parker de siempre, pero d’una manera distinta que, al empar que ser nueva, toca un poco tema devandichu: y ye que’l Spider-Man d’esti universu nun se convirtió en superhéroe cuando yera rapaz, sinón que garra los poderes siendo yá un paisanu, tando casáu con Mary Jane y teniendo dos fíos con ella.

Asina, esti ye’l plantegamientu que se guardaben mientres anunciaben les demás series del nuevu Universu Ultimate, que son les siguientes:

  • Ultimate Universe, un one-shot con unos Vengadores (o Ultimates) a los que vuelve Jonathan Hickman (con Stefano Caselli) y que nesta ocasión formen el Capitán América, Thor, Iron Lad, Lady Sif y Reed Richards como’l Doctor Doom.
  • Ultimate Black Panther de Bryan Hill y tamién Stefano Caselli, onde’l rei de Wakanda a enfrentase a la invasión d’un exércitu comandáu por Moon Knight.
  • Ultimate X-Men por Peach Momoko, una artista mui especial que promete dar una visión perorixinal de los mutantes.

Ah, meca, y olvidábemos dicir qu’esta serie de Spider-Man tamién la guioniza Jonathan Hickman (convirtiéndose nel arquitectu indiscutible d’esti universu), y dibúxala Marco Checchetto.

Leave a Reply

La to direición de corréu nun va espublizase. Los campos riquíos márquense con *