Anque la temática de Star Trek siempre me llamó, de guaḥe yera más de ver les películes, pos les series acababen aburriéndome. Un ritmu dacuando un poco calcu (pola mor del paecíu que dan adré ente naves espaciales y somarinos), asina como cierta repetición nos argumentos, alloñábenme de ver una serie completa. Acaba viendo namás episodios sueltos, d’esos que pilles na tele empezaos y quedes a ver qué pasa.
La cosa cambió cuando tuvi accesu a la serie orixinal, pos nella había un encantu que nun tenía visto nes demás. Per un llau, pola influyencia de la space opera más clásica al estilu de Flash Gordon, col capitán más machu de la rodiada engarriándose y rompiendo la camisa na metá los episodios. Per otru, el componente más fondu de contradicción ente la visión de Kirk, más vitalista, y la so apoloxía de la necesidá de los instintos primarios del home mesmamente nun futuru utópicu, a la contra de la de Mr. Spock, más positivista. Y too ello nun ambiente camp de lo más coloríu, que-y daba un toque enforma inxenuu mientres dalguna de les histories yera bien complexa. Otres non tanto, claro, porque’l contraste ente altos y baxos tamién yera notable.
Esi aire aventurero, un poco perdío desque la primer película intentó tomase demasiao en serio, recuperóse en gran manera col reboot de 2009. La serie Discovery tuvo bien les primeres temporaes, y encantóme cuando salieron de convidaos los tripulantes de la Enterprise. Nun sabéis lo allegre que me punxi cuando anunciaron una serie pa ellos.
Esta serie nun ye un remake de la orixinal, por si nun lo sabéis, y ye qu’esta tuvo un episodiu pilotu, non estrenáu hasta más de venti años dempués, con otra tripulación distinta como protagonista, y que se desechó pa facer abondos cambios. De los personaxes namás quedó Spock, y los demás quedaren nel escaezu de nun ser porque usaron el metraxe, más tarde, pa una trama na que se presentaba esa tripulación como l’anterior de la Enterprise. Y ye d’esta, a mou de precuela, de la que trata la serie nueva, unos años primero de capitaniar la nave Kirk.
Los argumentos tán bastante bien, pelo menos de momentu, non especialmente orixinales pero porque la serie busca sobre manera’l fan de siempre. Sicasí, hai personaxes interesantes, tanto de los clásicos (llámame especiamente Rebecca Romjin como Nuber One) como los que presenten nuevos (por casu una descendiente del malváu Khan), y faen lo típico d’afondar nes motivaciones d’ún distintu en cada episodiu. Pero lo que me namora de la serie ye’l cuidáu col que traten el material orixinal, nun perdiendo esi aire retro pero faciéndolo too con unos medios tremendamente superiores. Ello produz un efeutu maraviyosu al ver aquelles máquines con botoninos y llucecines de colores axuntaos ensin sentíu, pero al empar xuncíos con pantalles táctiles d’imáxenes n’alta resolución. El capitán Pike, anque diferente a Kirk, arreciende esi mesmu paisanismu (y menudu pelazo tien), anque ello nun quita qu’haya otros personaxes a la contra de los arquetipos que, a güeyos d’anguaño, puen resultar rancios. Pero ye que’l futuru ye diversu, y ello nun impide qu’esfrutemos nél de les figures clásiques, sinón que son unes más d’un universu nel que la diversidá arriquez.
La serie ta disponible en SkyShowtime, y si queréis poder ver un avance calcando equí.
