Güei ye’l día oficial de Star Wars (xugando cola famosa fras de la película “may the force be with you“), parte d’esti santoral nuevu que tenemos dende va unos años, y Disney aprovéchalo pa dar salida na canal de streaming a dos estrenes bien llamaderes.
Per un llau, tenemos la segunda temporada (o segundu volume, como prefieren llamala) de Star Wars: Visions, la antoloxía d’animación na qu’estudios distintos van dando una perspeutiva mui propia de la saga y de les posibilidaes pa contar hestories que ven nella. Esta estrénase con un primer capítulu de la española El Guiri Studios, y compónse de nueve episodios nos que van facenos viaxar por tou tipu d’animación, dende la más tradicional hasta la más anovadora. Si queréis ver un avance, podéis facelo calcando equí.
La otra serie ye una estrena total, anque tamién van los tiros pola animación. Ye Star Wars: Young Jedi Adventures, una serie pa los más pequeños, y va sobre unos rapacinos jedi que viaxen pela galaxa na dómina de l’Alta República (sieglos primero de les películes). Tamién podéis ver l’avance, que ta calcando equí.
Pa les series vinientes d’aición real, por embargu, hai qu’esperar hasta agostu, cuando salen la primer temporada d’Ashoka y la segunda d’Andor. Y depués, pa finales d’añu, la estrena de Skeleton Crew con Jude Law. Conque hai Star Wars pa ratu.
