Starfield, Starfield, Starfield. Nun se falaba d’otra cosa primero de la Showcase de Xbox-Bethesda de la selmana pasada. Ensin noticies de The Elder Scrolls VI dende cuantayá, el nuevu xuegu que s’espera que salga dafechu a la lluz en 2023, yera’l buque insinia de toles creaciones que la compañía americana diba a presentar na so “showcase”.
El xuegu, que lleva cerca de 10 años en desendolcu nos estudios de Bethesda, va ser, por dicilo de dalguna manera, una especie de “Skyrim espacial”. Nél, los xugadores van poder crear un personaxe (paez que namás humanos, anque de tolos aspeutos) y va poder personalizar les armes, les naves espaciales… too. Un poco como se fixere en Skyrim col armamentu, la maxa, la ropa y los encantamientos. En Starfield va ser posible tanto facer combates a tiros a lo FPS, como de naves espaciales. Pel momentu, lo que se vió de dambos yera un aspeutu que facía muncho pensar en cualquier FPS y en videoxuegos de naves como Star Wars Squadrons; pero non un modelu de combate con elementos RPG como’l que teníemos col V.A.T.S. en Fallout.
RPG y milenta planetes
Sicasí, paez que la parte RPG nun va tar ausente: Los personaxes van evolucionar amestándo-yos carauterístiques y ventayes distintes, amás de poder personalizar les armes, la ropa y… ¡Hasta les naves espaciales!
Pero de tolo qu’amosó Xbox Bethesda hasta’l momentu; lo que más llama l’atención ye’l grandor que tien l’universu xugable. Cada planeta nun ye una “pantallina”, sinón que ye un universu que se pue esplorar, que tien climes y partes distintes y fauna y flora estremao. Y enriba d’esi nivel de detalle y de desendolcu, los desendolcadores de Starfield cuéntennos que vamos tener nada menos que 100 sistemes solares distintos con, pelo menos, 1000 planetes visitables y xugables; lo que fai una media de diez planetes por cada sistema solar.
Nel videu, pudimos ver coses interesantes como son, por casu, les grandes ciudaes nes que too paez indicar que vamos poder rolear muncho y consiguir misiones que facer nos asteroides y planetes perdíos… El xuegu dexónos los dientes llargos, sí; pero va tocar esperar hasta l’añu que vien (probablemente a finales) pa poder pasalo bien con esti xuegu increíble.
