Va dir yá trés díes que salió’l State of Play, el mayor acontecimientu añal nel que Sony presenta les sos novedaes pa Playstation, y en Refuelgu! tovía nun vos contamos nada d’ello. ¿Qué ye lo qu’anunciaron? Vamos facevos un resumín de lo más importante:
Suicide Squad: Kill the Justice League
La producción de Rocksteady sobre esti equipu disfuncional d’antihéroes tien tola pinta de ser un xuegazu, nel que nos ponemos nel pelleyu de Harley Quinn, Deadshot, King Shark y Captain Boomerang, caún con unes habilidaes mui distintes. El 26 de mayu sal pa Playstation, Xbox y PC, y gracies al eventu podemos esfrutar d’unos cuantos avances nuevos y bien llargos. Dexámosvos con ún calcando equí, pero volvéi llueu qu’hai munches más coses que contavos.
Baldur’s Gate 3
El clasiquísimu xuegu de rol ambientáu en Mundos Olvidaos, que foi a marcar a toa una xeneración, vuelve’l trenta y ún d’agostu con una tercera parte, que solo va salir (de momentu, pos tienen problemes téunicos pa Xbox) pa Playstation 5 y PC. Prometen posibilidaes increyibles d’esploración del mundu, y podéis ver qué pinta tien calcando equí.
Resident Evil 4 Remake
El 24 de marzu, lo que ye en nada, sal tamién el nuevu remake de Resident Evil, yá’l de la cuarta entrega, y tamién punxeron un avance pa dexanos los dientes llargos. Vamos tenelu pa Playstation, Xbox y PC, y podéis contemplar lo tremendo de les meyores calcando equí.
Street Fighter 6
La entrega nueva del xuegu más clásicu de llucha zarra la presentación de los personaxes colos que-y quedaben (Cammy, Zangief y Lily) nun vidéu nuevu de gameplay que podéis ver equí. Va salir el dos de xunu pa Playstation, Xbox y PC.
Naruto x Boruto: Ultimate Ninja Storm Connections
Otru xuegu de llucha que va tener entrega nueva esti añu, y na que vamos poder gociar de manexar el mayor elencu de personaxes de tola saga (¡más de cientu trenta!) va tar pa toles plataformes: PC, Playstation, Xbox y Switch, pero d’esti tovía nun tenemos fecha confirmada. De toles maneres, sí que podéis ver yá qué aspeutu tien, namás calcando equí.
