IDW, la editorial que tien trayío crossovers de lo más esparataos, como puen ser Transformers/My Little Pony o Star Trek//Doctor Who, sorpriéndenos de nueves con una serie curtia na que van vese les cares (y partíseles, por supuestu) los lluchadores de los videoxuegos de Street Fighter coles famoses Tortugues Ninja. ¿L’argumentu? Los dos equipos enfréntense nun tornéu de llucha n’Atlantic City, y pa detrás van vese envueltos nuna riestra de desapaiciones misterioses per tola ciudá, qu’evidentemente van tener d’investigar xuntos, siendo l’organizador del tornéu’l principal sospechosu.
La serie va tar guionizada por Paul Allor (yá guionista de la serie abierta de les tortugues, y tamién de Guardians of the Galaxy) y dibuxada por Ariel Medel (Xena: Warrior Princess y John Carter: Warlord of Mars). El guionista promete diversión al atopar na hestoria una sorprendente afinidá ente Michelangelo y Chun-Li, o cola rivalidá que va surdir ente Raphael y Guile.
La serie de cinco númberos mensuales estrénase nos Estaos Uníos en mayu, y yá tenemos como muestra la portada y dos páxines del interior, anque tovía ensin coloriar nin rotular. Dexámosvos con elles y les ganes de saber más.
