Sí, esti titular anuncia daqué que va asoceder de manera lliteral, y qu’hasta agora nun pasare más que pela cabeza de dalgún neñu friqui y, quiciabes, nuna performance colos moñecos que tenía per casa. Y ye que nun tamos falando de qu’unos y otros compitan nos cines, a ver cuála ye la película que recalda más o dalgo de pol estilu, sinón que, nuna collaboración ente DC y Legendary Comics, l’equipu estrella de superhéroes, la Lliga de la Xusticia, va enfrentase a los dos monstruos xigantes más importantes de la historia del cine. De fechu, el nome de la serie curtia na que van dase pa fregar unos a otros nun pudiere ser más esplícitu: Justice League Vs. Godzilla Vs. Kong.
Esti ye un crossover del que l’anunciu llega por sorpresa a la San Diego Comic-Con, tan recién que de fechu nun hai imaxe dala oficial en redes, namás semeyes que la xente sube de la revistina na qu’espublicen delles páxines promocionales (conque vos pidimos disculpes pola calidá de les imáxenes qu’axuntamos embaxo).
Por embargu, nelles podemos ver yá delles coses que nos esperen. Per una parte, qu’o bien la hestoria nun va siguir la continuidá de DC (lo que permitiría facer cualesquier estrozu nel universu, como matar superhéroes importantes) o bien ta ambientada nel pasáu, pues Clark Kent paez tar pidiendo matrimoniu a Lois Lane cuando Godzilla apruz nel horizonte de Metrópolis (y la pareya yá casó amunchayá, nos años noventa). Que la hestoria tea ambienta nel pasáu ye, sicasí, poco probable, pos entre los personaxes vemos a Jessica Cruz, Green Lantern creada en 2014. Per otru llau, que van quedar delles imáxenes grabaes pa siempre na historia del cómic, como la de King Kong engarrancháu al edificiu del Daily Planet.
Legendary Comics ye una editorial creada pola productora sobre manera pa esplotar les sos franquicies non solo nes películes (amás de Godzilla o Kong, tamién otres como Pacific Rim o Detective Pikachu), pero tamién tien obres orixinales como Holy Terror de Frank Miller (na qu’un personaxe con demasiáu asemeyu a Batman s’enfrenta a Al Qaeda) o una versión de Drácula protagonizada por Bela Lugosi (pos pagaron a los herederos por pone-y el so rostru al personaxe). Esta ye, por embargu, la primer vegada que collaboren con una de les dos grandes editoriales nun productu tan llamaderu.
