La serie de televisión foi’l númberu ún de Netflix, magar qu’anda rulando per redes un corréu electrónicu, de va unos años, nel qu’aseguren al autor del cómic que naide nun querdría ver una serie sobre un neñu-venáu. Y ye que yo pertaría d’alcuerdu con tala afirmación si lo que teníen na cabeza yera la hestoria d’esi neñu-venáu, escrita y dibuxada por Jeff Lemire pa Vertigo, el sellu p’adultos (yá fináu) de DC. Y ye que, anque la llinia argumental ye más o menos la mesma en dambos dos medios, el tonu y los sentimientos que produz el cómic son cuasi los contrarios a los de la serie la canal. Ta claro que ye imposible comparalos ensin falar de lo qu’asocede nún y na otra, pero vamos evitar mentar lo que pasa acullá la primer temporada pa que quien viera la serie nun tenga mieu de lleer esti artículu por enterase de qué asocede dempués.
La serie de televisión preséntanos un mundu posapocalípticu nel qu’un día, de sópitu, la xente escomenzó a morrer por un andanciu de veniencia desconocida y, al empar, los neños a ñacer con abondos trazos animalinos. En cómic ye más o menos lo mesmo, anque, d’otra manera, nun ye que la enfermedá se pegue, sinón que toos son portadores, y lo de los neños ye al principiu una especie de lleenda urbana na que la xente nun acaba de creyer. Nel primer capítulu, dambos dos medios céntrense nel protagonista indiscutible, ún d’estos neños, que tien trazos de venáu y vive con so pá nuna viesca fasta esti morrer y él vese empobináu a marchar. Y yá equí ye onde entamen les diferencies más gordes, porque mientres qu’al pá na serie nos lo presenten como un héroe, un padrazu que ye a curiar y educar un bon guaḥe con too a la escontra, nel cómic ye un probe alloriáu con delirios relixosos y que da más mieu qu’otra cosa.
Y ye que la mayor diferencia na adautación va ser la ñatura de los personaxes, qu’en cómic son fondamente imperfeutos y de moral más que discutible. Lo mesmo podemos ver con Jepperd, que na hestoria orixinal nun ye un ex-cazahíbridos arrepresu, sinón un matachín con un envís terrible pa col neñu; tamién col doctor Singh, que nun trabaya como doctor Mengele porque-y secuestraren la muyer. En cuenta d’Aimee, fundadora d’un abellugu pa los neños animalinos, tenemos a Luce, una prostituta. Y lo que na serie ye una banda de “neños perdíos” qu’adora los híbridos, en cómic ye una secta que paez sacada de Mad Max. Y ye qu’esi tonu de cuentu de la serie, con un aldéu bultable al de les películes de Wes Anderson (y que nun vamos negar que-y da guapura, al empar que xustifica les aiciones de cuasi tolos personaxes), nel cómic namás que podemos velu asomar en dalgún capítulu sueltu, a mou d’alliviucu poles coses espantibles que primero nos pon énte los güeyos. Ah, y nun podemos dexar pa prau una cosa llamadera del cómic, lo menos en 2021, y ye la falta de muyeres; pémeque nun pasa’l test de Bechdel fasta’l capítulu diecinueve (de cuarenta), un defeutu que la serie de televisión tien el tinu d’iguar.
Netflix fixo una bona serie, eso ye verdá, y de xuru que’l públicu d’esta ye mayor del que sedría a tener de tar más basada en cómic. Pero les diferencies son tantísimes que resulta difícil afirmar que la hestoria seya la mesma. Magar que quiciabes ye por eso, por estremase tanto, que podemos esfrutar de dambes dos.
