Nun fai falta recordavos que les series coreanes (magar lo que diga Steven Spielberg) lleven un percorríu d’años y años algamando cada vez más calidá, lo que-yos ta dando una fama y ésitu internacional nos caberos años con toa mena de xéneros. Si nos anteriores artículos vos recomendamos Kingdom, Tamos Muertos o Mr. Sunshine, güei vamos recomendavos Ta bien nun tar bien, una serie dramática con visos fantásticos, onde naide ye lo que paez y onde se visibilicen les enfermedaes mentales.
Asoleyada no cabero de 2020, esta serie tien 16 capítulos d’unos sesenta minutos caún, caún tituláu col nome d’un cuentu popular y nel que lo que pasa nun dexa de ser una reversión d’ellos, onde los personaxes que nos presenta tán viviendo les histories más tradicionales, con xiros inesperaos en comparanza cola historia orixinal y con personaxes que nun son tan bonos o tan malos como amuesen. Dafechu, caún de los capítulos lleva un títulu d’un cuentu tradicional.
Una serie con munches capes
Dicir de qué va Ta bien nun tar bien ye enforma difícil, porque ye una serie con munches capes, histories y referentes que van filándose hasta desendolcar nel final. Tola historia xira alredor de Ko Mun-yeong, una escritora de cuentos infantiles y Moon Gang Tae, un cuidador nun centru psiquiátricu.
Ko Mun-yeong (interpretada por Seo Ye-ji) y Moon Gang Tae (interpretáu por Kim Soo-Hyun) alcuéntrense nel primer episodiu nel centru psiquiátricu, onde ta ingresáu’l pá d’ella, que tenta d’atacala, pero sálvala Moon Gang Tae. Nesi momentu Ko Mun-yeong encaprichase con que seya’l so noviu y asústalu. Too se complica cuando l’hermanu pequeñu de Moon Sang Tae, que tien autismu y ye mui fan de los cuentos de Ko Mun-yeong, se decata que l’hermanu la conoz, y ella aprovéchase d’esta situación pa tentar d’averase a Moon Gang Tae. Ye ehí cuando aparentemente entama una historia d’amor mui poco convencional, anque na realidá, col desendolcu de la historia, vamos viendo que na realidá los sos caminos cruciáronse muncho enantes.
Los dos filos principales que conducen la historia ye’l pasáu de dambos protagonistes. Nel casu de Ko Mun-yeong, sábese que de pequeña vivía nun castiellu que’l pá construyó pa la familia, aisllada de tol mundu, y que la madre d’ella morrió y el pá tuvo implicáu. Nun dexa de ser una princesa del sieglu XXI, que tien tolo que quier pero nun tien afectu. Per otru llau, nel casu de Moon Gang Tae (y l’hermanu), sabemos que se muden cada ciertu tiempu, y qu’esto tien rellación con que cuando yeren pequeños daquién asesinó a la so má delantre de Moon Sang Tae, que tien un trauma por ello y solo s’alcuerda de qu’había una caparina (fechu qu’al final de la serie tien tol sentíu). Amás, Moon Gang Tae ye l’hermanu pequeñu, que tiene que curiar del so hermanu mayor.
Magar los filos principales, estos al empar entrellácense coles histories más curties del restu de personaxes que nun son menos interesantes, sobretoo de los pacientes y la xente averao del siquiátricu, de cómo hai xente malo que-yos destruyó la vida y cómo hai xente bono que los ayuda ensin interés dalu a reconstruyila.
Si daqué caracteriza a la serie ye que tolos personaxes tienen dengún trestornu, non solo los pacientes del siquiátricu: por exemplu, la propia protagonista tien un trestornu narcisista y antisocial, demientres que’l protagonista tien un trauma infantil non superáu que lu fai aisllase de los demás. Amás, la serie nun dexa de tener la moralexa de que, nel fondu, toos en menor o mayor grau tenemos dalgún problema, y que la xente que ta considerada lloco nun ye distinta a la xente normal.
La serie tien un guión mui bien filáu y trabayáu qu’amás ye bastante imprevisible, que va acompañáu con un elencu d’actores con munchu percorríu y calidá interpretativa (y qu’a poco que teáis de ver series coreanes vos van sonar). Ye de destacar l’actuación d’Oh Jung-se (nel papel de Moon Sang Tae), un actor perbonu caracterizáu pola so versatilidá, qu’algamó una montonera de premios tanto por esti papel como otros.
