Nel caberu artículu sobre drames coreanos falémos de que se diba estrenar Tamos muertos (All of us are dead), otra serie de zombis, ésta ambientada nun institutu n’actualidá. Paecía que la serie diba tar interesante, pero naide nun esperaba l’ésitu tan ablucante que ta teniendo. Ye talu’l boom que nos sos primeros díes d’emisión superó como estrenu al Xuegu del xubión, algamando más de 125 millones d’espectadores nos sos primeros díes. Nun se sabe entá si a la llarga va superar toles vistes globales, pero ta faciendo camín pa ello.
Tamos muertos desendólcase nel institutu de la ciudá de Hyosan, onde un grupu d’estudiantes tien que sobrevivir a una montonera d’estudiantes que se convirtieron en zombis. Nun tienen comida, nin saben por qué ta pasando eso y la única idea que tienen ye consiguir llegar vivos hasta que daquién los venga a rescatar.
Una hestoria alredor d’un institutu
Ye nesi institutu onde entama tola historia, porque un profesor tuvo investigando en ratones col virus y accidentalmente ún d’ellos muerde a una alumna, qu’al empar muerde a la enfermera del institutu. Los servicios d’emerxencia lleven a l’alumna al hospital, onde sigue atacando a la xente y onde entama a espardese’l virus tamién pela ciudá, que queda aisllada pol exércitu.
El grupu de supervivientes ta formáu na mayor parte por compañeros d’una clas que se xunten con dellos amigos d’otres aules, pero nun hai una rellación d’amistá ente toos ellos, ye más, dellos nun se lleven bien. Esto fai qu’al empar que tenten de sobrevivir tengan conflictos abondo, llegando a desendolcase delles decisiones o aiciones que se puen cuestionar. Amás, como ye típico d’esti xéneru, la serie nun se corta a la hora de que muerran protagonistes (pero nun vamos cuntavos quien).
Na serie vamos conociendo al empar les histories de los alumnos supervivientes, tamién de los sos familiares, que tan nel esterior sobreviviendo al ataque zombi y de delles persones con poder de la ciudá y nel país, que van tener que tomar delles decisiones complicaes pa salvar a la mayor parte de xente.
Si daqué tien esta serie ye que nesi ambiente no que lo principal ye sobrevivir desarróllanse histories d’amor o amistaes que nun situación normal nun asocederíen, y conocen a esos compañeros que vien pelos corredores del edificiu y ven que detrás de caún hai una historia familiar y personal que los fai ser como son.
De momentu solo hai una temporada y ta anunciao que se ta faciendo una segunda temporada. La serie tien un final abiertu y dexa la dulda de a quién ven al final los que sobreviven. Ye una serie entretenida (anque ye verdá que dalguna escena d’enfrentamientu a los zombis pue ser un poco repetitiva). Hai que-y reconocer, eso sí, que la serie da una esplicación a qué ye lo que-y ta pasando a la xente y cómo se fizo’l virus zombi, una esplicación bastante bona amás.
Tamos muertos ta basada nun webtoon (un cómic que s’espubliza en llinia y en formatu vertical) surcoreanu nomáu Now at our school, que nos cuenta tamién la historia d’unos estudiantes que tán atrapaos nun Institutu cola mayor parte de collacios convertíos en zombis.
Sicasí, nun ye’l primer cómic d’esti estilu: nun podemos escaecer el manganime perconocíu High School of the Dead o otros títulos como I’m a zombie o Sankarea. Les histories con estudiantes de secundaria n’escenarios con zombis son bastante comunes en Xapón.
