Quentin Tarantino ye, ensin dulda, ún de los más grandes direutores vivos. Tien yá diez películes al costazu (nueve si consideramos, como él quería, que Kill Bill ye solo una), y el problema ye que siempre tien dicho que diba retirase del cine con menos. Agora, cola estrena de The Movie Critic cerca (de la que tovía sabemos mui poco, pero que va salir en dalgún momentu de 2024), los siguidores tienen mieu de que, como paez prometer, nun va facer más nada na vida. Y proyeutos de los que se ruxía dende va tiempu, como una película de Star Trek dirixida por él, tienen más pinta que nunca de quedar pa prau.
De fechu, nunes declaraciones nueves (n’esclusiva pa Deadline, podéis veles calcando equí) critica otra vegada cómo ta empobinándose la industria cinematográfica, non yá pola “marvelización” como fizo n’otra ocasión, sinón porque pa él les películes han pensase pa estrenase nos cines, non nes plataformes de streaming. “Sony ye l’últimu xugador de na ciudá que ta n’absoluto, dafechu, comprometíu cola esperiencia cinematográfica”, diz, “xulguen l’ésitu poles películes qu’entren nel zeitgeist, non por facer una peliculona cara y depués ponela na plataforma de streaming“. Asina, sobre les películes estrenaes nestes plataformes llega a dicir que “ye cuasi como si nun esistieren”. Ye por ello que-y gusta más que nunca la idea de dalo too trenta años y depués marchar, porque nun quier trabayar con “rendimientos decrecientes”.
Estes declaraciones son tovía más dolioses si tenemos en cuenta que tamién declara, nesta entrevista, que tuvo a puntu de facer una versión de Casino Royale, el clásicu de James Bond d’Ian Fleming, ambientada nos años sesenta y daveres basada nel llibru, non garrando dellos personaxes, dalgún detalle de la trama y diendo per otru sitiu como faen siempre coles demás películes.
Quédanos una esperanza, eso ye verdá, y ye que dexa abierta la posibilidá de facer series de televisión. ¿Prestaríavos una adautación d’una franquicia, o dalgo dafechu orixinal?
