La industria de videoxuegos d’España ye potente, y esta potencia amuésenla los distintos xuegos que nun paren d’asoleyase. Nos caberos años podemos atopar distintos nomes como Blasphemous, RIME, Magic Twins,…y del que güei vamos falar: el Temtem, al que munchos atopen semeyances col Pokémon.
Esti videoxuegu asoleyase’l 21 de xineru de 2020 pa PC en fase de Beta abierta, ye dicir, el xuegu entá nun taba (nin ta) acabáu, pero pue xugalu cualquiera que lu merque. Con posterioridá’l conteníu que falta va poder consiguise per actualizaciones (de baldre). Tamién ta disponible agora en Play Station 5 y XBOX Series X y XBOX Series S.
Temtem ye un xuegu de rol multixugador masivu en llinia, nun ye raro atopar a otros usuarios de la que vas pel mapa, y da fechu pues falar y combatir con ellos. Esti xuegu foi desarrolláu pol estudiu de desarrollu Crema Games, que tien la so sede en Madrid.
De qué va’l xuegu
Nel xuegu yes un domador de temtem, que tien viaxar pel archipiélagu desafiando a los distintos maestros de Dojo, caún especializáu nun tipu de temtem. Al entamu dante a escoyer ente trés temtem, y pues dir cazando coles teamcard los salvaxes qu’atopes. Tamién tienes que t’enfrentar a unos villanos, nesti xuegu llamaos Clan Belsoto, que tán esperimentando colos temtem y paez que nun tienen bones intenciones.
Cuando entames, amás, pues personalizar al to domador, tamién la ropa (vas poder mercar más nos diferentes pueblos) y yá al entamu entrúgate cómo quies que se dirixan a ti: da la opción d’él, ella o elle. Ta perbién qu’un xuegu contemple la opción neutra. Tamién ye un xuegu nel qu’encuentres diversidá de personaxes, tanto diversidá racial como de cuerpos.
Los temtem tienen distintos tipos, ente los que podemos atopar clásicos como agua, fueu, tierra, naturaleza,…y otros más anovadores como tipu cristal o dixital. Amás, según el tipu de la to criatura va tener más efeutu en dellos tipos y debilidá y menos efeutu en contra d’otros. Estes criatures amás tienen fatiga, ye dicir, que cuando faes dellos ataques tienes que tar sollerte a que nun se fatigue porque al empar qu’ataques al enemigu tamién te manques tu.
Semeyances con Pokémon
El xuegu paezse muncho a Pokémon, sobre too na dinámica de xuegu y nel desendolcu de l’aición, pero hai que dicir que ye un xuegu muncho más complexu en munchos sentíos. El xuegu ye más complicáu qu’un xuegu de Pokémon y los oxetivos son más difíciles de consiguir.
No que cinca a los combates, hai que tener en cuenta más variables, amás siempre xuegues con dos temtem y contra dos temtem, y hai vegaes que dos temtem faen combu ente ellos. Amás la fatiga, de la que yá faláramos, fai que tengas que tar sollerte a nun mancate a ti. Tamién venceyao al combate tán los Dojos, que tienen sistema de puzzle pa llegar al maestru, y son sistemes muncho más complicaos que los que podemos atopar en Pokémon. Amás, los maestros son muncho más fuertes que los llíderes qu’atopamos na saga Pokémon.
La historia, magar que’l xuegu ta en Beta abierta y tovía y falta un cachu, da más vueltes que la de Pokémon, y tien más misiones ensin tar entá completa. Amás, el tramu de xuegu qu’hai lleva yá más hores que pasar la historia principal d’un de los xuegos de Pokémon.
No que cinca al aspeutu de diseñu de personaxes, podemos considerar que los personaxes de Temtem son paecíos a los del anime y el diseñu de mapes del xuegu ye mui lluminosu y coloríu. Gráficamente tamién ye más potente, ta pensáu pa xugar en toles plataformes, nun podemos escaecer que nun ye un xuegu esclusivu d’una plataforma como ye’l casu de Pokémon.
Y dempués de contavos too esto, yá queda que prebéis el xuegu y que pongáis güeyu na industria del videoxuegu española.
