Por Adrián Carbayales

Los años cincuenta resultaron difíciles pa munchos estaoxunidenses. Bastaba un comentariu demasiao progresista, delantre d’un puntu de mal enclín, pa que te fixeren un xuiciu sumarísimu nel que t’acusaren de comunista y traidor a la patria. Perconocíu ye’l casu la industria cinematográfica, pero pa nada foi l’únicu qu’hebo.

En 1954, el sicólogu Fredric Wertham espublizó’l llibru Seduction of the Innocent, nel qu’afirmaba que cuasi tolos sos pacientes menores d’edá teníen lleío cómics (como cuasi tolos rapazos de la época) y por ello nun tenía dulda de qu’estos yeren la causa les sos perversiones. Dicía que los cómics de crimes deprendíen cómo cometelos, que los románticos empobinaben a la prostitución infantil; llegó a asegurar lloqueces como qu’había dibuxos dientro de los dibuxos, escondíos pa los neños que supieren buscalos, señalando unos xenitales femeninos na solombra d’un costazu masculín. Pa él, Superman yera un facista antiamericanu, que bien podría llevar dos eses en pechu y qu’afalaba a facer bones aiciones namás por consiguir reconocencia (nun-y paeció importar que lu crearen dos xudíos, o que cola identidá secreta se refugaba de llevar cualesquier méritu); Wonder Woman yera una lesbiana cruel que facía pensar que la independencia y la fuercia femenines yeren deseables (bien por ella, el so creador hinchiríase d’arguyu de siguir vivu pa entós); sobre Batman dicía que vivía nun paraísu homoeróticu, teniendo una rellación con Robin qu’estimulaba’l maxín de los neños p’axuntase con homes.

Sicasí, enantes comentemos que les acusaciones a Superman nun teníen xacíu dalu, y que les de Wonder Woman cuasi yeren un repulgu. ¿Qué pasa coles de Batman? Sedría cenciello dicir que los prexuicios d’entóncenes nun permitíen ver una rellación de paternidá sana ente un home y el rapaz qu’afiara. Por embargu, ye difícil aporfiar nello cuando lleemos dalgún cómic de los qu’asoleyaben naquelles: Duermen en cames apegaes, magar que tienen toa una casona pa ellos; nun hai poques viñetes que, sobre too fuera contestu, paecen tar faciendo chancia d’una rellación amorosa o sexual ente ellos; hai otres hestories que nin con tol contestu del mundu abulten inocentes. En Batman #65 (1951), Robin máncase la rodiella, lo que fai que quede un tiempu de cama, y Batman llucha escontra’l crime con ayuda d’otru collaciu. Robin célase una barbaridá mentanto los superhéroes pasien per un parque faciéndose galanes, y unos paisanos comenten qu’esi ye meyor compañeru pa Batman, que como ye un home de verdá pue facer con él coses que nun sedría a facer con Robin.

Dende aquella, la custión ye daqué que revolotia alredor de dambos dos personaxes. L’actor que fixo de Robin na serie los sesenta, Burt Ward, escribió na autobiografía que l’ambigüedá y los dobles sentíos en programa dexaben interpretar la rellación como homosexual. George Clooney asegura que nos noventa intepretó a Batman como un personax gay. Hai un superhéroe, Midnighter, que ye calcáu a Batman, cola peculiaridá de que tien de mozu a ún que ye calcáu a Superman. Cuando Batwoman tornó nos años dos mil, fixéronla lesbiana como redención y chufa pola causa la so creación. El gran Alan Moore trató lo polémico de les rellaciones de los superhéroes colos rapazos ayudantes na serie de cómics Top 10. Grant Morrison, ún de los autores más importantes de la industria’l cómic y que guionizó dellos años los cómics de Batman, dixo esto nuna entrevista pa Playboy:

La homosexualidá ye inherente a Batman. Nun falo d’homosexualidá en sentíu peyorativu, magar que Batman ye mui, pero que mui gay. A cencielles nun se pue negar. Bultablemente, como personax de ficción, búscase que seya heterosexual, pero tola base’l conceutu ye pergay. Escurque eso ye polo que-y gusta a la xente. Toes eses muyeres tremendes que lu pretenden, vistíes con ropa sensual y que blinquen pelos teyaos p’atayalu. A él nun-y dan más, quier más pasar el ratu col vieyu y el rapaz.”

Por embargu, la posible homosexualidá de Batman ye tabú en DC. Hai milenta batmen de milenta mundos; ún ye vampiru, otru ye pirata, hai un vaqueru, ún con aniellu de Green Lantern, inclusive ún que ye un monstruu de fantasía medieval… Hai ún afroamericanu, ún asiáticoamericanu que va al institutu y una muyer d’un universu na que tienen los xéneros al aviesu qu’en principal. Son tantos qu’habríemos pasar hores cuntándolos. ¿Un Batman gay? D’eso nun sabemos nada entovía. Ye verdá que nun sedría daqué ensin polémica, sobre manera porque Robin yera un rapaz qu’afió, pero hemos recordar que la sensibilidá coles edaes ye más d’agora que d’aquellos tiempos y, mesmamente, n’España, foi en 2015 cuando dexaron de poder considerase consentíes les rellaciones ente un adultu y un rapaz de trece años (edá na que Batman lu afía nes más de les versiones). Amás de que siempres podría presentase como dalgo qu’asocediera llueu d’años, siendo Robin yá adultu, porque nun ye guaḥe siempres; anguaño apaisanó (faise llamar Nightwing) y Batman echó la ceremonia na que se casó con Batgirl. Llama l’atención que con toles versiones alternatives de los personaxes que surden cada añu, y lo de moda que ta camudalos pa facer les hestories más inclusives, entovía sigue la pantasma de Wertham pehí, trancando l’armariu del que l’héroe amazcaráu nun pue salir.

Leave a Reply

La to direición de corréu nun va espublizase. Los campos riquíos márquense con *