Por Aymara González
Fai tiempu que vemos noveles y antoloxíes ambientaes toes o en parte en medios rurales. Dalgo que, de primeres, habría prestar, ¿non? Tolos asturianos y asturianes, anque seya por accidente, tenemos dalgo que ver (cuando non muncho) col mediu rural. Y estos llibros rescamplen nes estanteríes, aporten como recomendaciones. Ye una temática qu’habría prestar. Habría.
Tener pueblu ye, les más vegaes, una capa de proteición nesta sociedá de camín al urbanitismu. Hai dalgo de natural, puro, ensin filtrar neses declaraciones. El pueblu como posesión puede ser munches coses: tener raigañu, identidá, pasáu, vía d’escape. El pueblu como llugar puede ser un furacu, una Arcadia, un torbolín a vegaes, un círculu viciosu otres, el nuesu llar siempres. Y dempués tamos les y los mediu-mediu, destinaos a crecer en pueblu pero desaniciaos d’ellos o con un porcentax altu d’urbanidá. Nos tres casos, como siempre, la lliteratura puede rellenar carencies o furacos en nós mesmos, amás d’ayudanos a descubrir coses nes qu’igual nun somos a cayer solos/es.
Vien too esto a vueltes de dellos llibros qu’apaecieron nel caber añu, espublizaos dientru l’estáu español y ambientaos (en parte o dafechu) nun pueblu o entornu rural. Dellos mui publicitaos, premiaos, cellebraos; otros con menos bombu, con daqué d’encantu tapecíu na marabunta editorial. Parte recordaba Asturies, otros yeren pueblos netamente castellanos, manchegos, estremeños, andaluces. En dengunu terminabes de topar esa ruralidá central, aséptica y contradictoria de los mediu-mediu, nin siquier había un chisgu de ruralidá dende’l pueblu. Tolo que lleía recordaba a eses persones qu’aterricen en vacancies nel pueblu y, como nuna famosa película, decíen “tolo que baña la lluz ye de to”; o, pola contra, teníen l’ecu d’una ruralidá paródica sofitada nos cuatro pegollos d’un horru.
Nun hai problema en qu’heba destremaes perspeutives sobre’l fechu rural, sobremanera cuando, dempués d’un añu de pandemia, miremos la casina de la nuesa güela y les escapaes con otros güeyos. Tenemos de tornar, tenemos de topar y madurecer cómo nos sentimos nos pueblos (y fuera d’ellos) hasta poder dir. Y la lliteratura ye la meyor ferramienta pa viaxar nel sitiu. Pero como sigamos lleendo hestories de foriatos, ¿cuántu condicionaremos la nuesa reflexón?
