Un ésitu pol conteníu y l’asistencia, afirma la organización de la Convención de Fantasía Asturiana AsturCON, realizada esti sábadu 17 d’avientu en LABoral. Tres d’una ceremonia d’abertura na que s’entregó’l Premiu Fontenebrosa de la edición 0 al autor del que la obra da-y el nome, Vicante García Oliva, les editoriales Orpheus Ediciones Clandestinas, Sportula, Radagast, Trabe y HT Publishers participaron nes speed dates nes que pretendientes a autores-yos presentaron obres a la busca d’edición. Darréu comenzaron les meses nes qu’en total participaron decenes d’autores en castellanu y n’asturianu, y en toes y caúna d’elles hasta les nueve de la nueche (con parón pa xintar y visitar una esposición) con decenes de persones como públicu. Tolos actos foron billingües, asina como la participación del públicu, lo que dende la organización consideren un ésitu na normalización del asturianu.
Apocayá qu’acaben de xubir a redes un comunicáu que reproducimos darréu:
“Llegó’l día de depués. Tres d’un par de meses perintensos, l’AsturCON llegó, vio y, podemos decirlo, venció. Nun podemos tar más arguyosos y felices de lo qu’ayeri vivimos en @LABoral. Abrimos filu, que toca dicir munches coses.
Lo primero, agradecer a tolos que ficistis posible esta primer edición. Nun tenemos pallabres. Públicu, ponentes, moderadores, editoriales, Centru d’Arte y amigos que nos echastis una mano y agarrámosvos tol brazu.
Gracies a toos consiguimos l’oxetivu principal: acercar lo fantástico a la xente, crear comunidá, abrir les puertes pa qu’entre tol mundu y demostrar que, lo asturiano, presta mucho.
Fuimos bilingües (y ensin necesidá de traductores), ensin dramas y ensin discutinios que nos apartaren de lo importante. Como detalle queda que trés de los cinco moderadores yeren asturfalantes y ún de los tré direutores solo fala castellanu.
Naide se sintió escluyíu por usar una o otra llingua. Toos nos entendimos porque falamos el mesmu idioma: la lliteratura fantástica asturiana.
Dimos la posibilidá de qu’autores desconocíos se sienten con editoriales para enseña-yos los sos manuscritos: cómic, novela, manga… Tamos ciertos de que l’añu qu’entra van tar nel mercáu delles obres col sellu AsturCON.
Tamién punximos onde amerita al gran Vicente García Oliva entregándo-y el premiu 0 que lleva’l nome de la so obra más importante: Fontenebrosa. Caminamos sobre costazos de xigantes y l’AsturCON, como’l norte, nun escaez.
Tamién sabemos que lo d’ayeri ye ameyorable, qu’hai coses que nun tuvieron como nos prestaría. Ensin dir más lloñe, nun pudimos facer casu a les redes. Tuvimos desbordaos, pero l’añu qu’entra va correxise.
Porque sí, Asturcones dixitales: l’añu qu’entra va haber AsturCON. Y lo vamos facer meyor. Y más grande. Y más guapa. Y más de too. Gracies por tol amor. Querémosvos.”
