Ye tradición entregar nes Xornaes de Cómic d’Avilés los famosos Premios de la Crítica Dolmen, que la revista homónima da a los meyores cómics del añu. Por embargu, está edición (que van trescurrir ente’l doce y el dieciséis d’esi mesmu mes) les coses tán complicándose.
Y ye que David Rubín, autor que cola so obra nueva, Fuego, consigue nada menos que trés nominaciones (meyor obra, meyor guión y meyor dibuxu) anuncia en redes que renuncia a toes elles como protesta porque nun tea nominada nenguna muyer. Y ello paez nun ser un casu aislláu, sinón escomenzar un movimiento nuevu, porque Miquel Ángel Giner Bou, nomináu por María la Jabalina, tamién anuncia la so retirada. Nadar foi’l terceru en facelo, anque tamién criticando la manera na que se desendolcó too y que nun s’organizaren primero, lo que lu presionaba a manifestase “de manera maniquea”.
Per otru llau, yá surde una autora a protestar contra’l xestu de Rubín, Carla Berrocal, que considera que si l’oxetivu ye llamar l’atención sobre la falta de muyeres, la solución nun ye qu’homes se faigan protagonistes de la noticia, polo qu’habríen renunciar en silenciu. Y Jaume Vaquer, ún de los fundadores de Dolmen, escribe en redes sobre delles cuestiones que paecen desmontar les razones daes por Rubín:
Una, que nun ye verdá que nun haya muyeres nominaes, namás que nun les hai a meyor obra nacional. Amás, en pasáu sí les hubo ganadores, como foi’l casu de Rutu Modan (ganadora l’añu pasáu a meyor guionista estranxera) o Teresa Valero (en 2021 por meyor obra nacional, con Contrapaso).
Otra, que la metodoloxía que se sigue nel Salón del Cómic de Barcelona pa escoyer los nominaos, que ye con un sistema de votación de dos vueltes nel que participen “docenes de críticos”. Métodu col que nun alcuentra manera posible de consiguir más nominaciones de muyeres.
Y vós, ¿qué pensáis de la polémica?
