Los y les escritores Xurde Álvarez, Xulio Arbesú, Laura Marcos, José Luis Rendueles, José Ángel Gayol, Henrique Facuriella o Vanessa Rodríguez, l’académicu Pablo Rodríguez Medina, Chechu García, el dibuxante de cómic Alfonso Zapico y el restu de miembros (ver la semeya)… ¿Qué tienen en común toes estes persones? Amás d’un compromisu inquebrantable pa cola llingua asturiana, toos son o foron en dalgún momentu parte de la Tertulia Malory. ¿Y qué ye la Tertulia Malory? Equí un poquiñín de la hestoria y de la importancia que tien esti círculu pal desendolcu de les artes – y perespecialmente de la lliteratura asturiana.
L’orixe de la Tertulia Malory remóntase al sieglu pasáu, más concretamente n’ochobre de 1998, cuando un grupu d’escritores decide aconceyar na recién inaugurada cervecería Tom Malory de L’Entregu tolos vienres. “Nos primeros años los asistentes estables yeremos: Ana Rosa Fernández, César Rodríguez, Xulio Arbesú, Chechu García y Roberto Corte”, rellata Chechu García, el que ye l’ideólogu d’esta tertulia. La fundación del bar y de la propia tertulia van de la mano.
L’entamu de too ye un taller lliterariu que se desendolcó en 1995 na biblioteca de L’Entregu, dirixíu por Benigno Delmiro Coto. García siguió en contautu cola xente que conociere nél per carta (pos tuvo que dir a poner escuela en Ceuta) y acabó xuntando a “xente como Xulio Arbesú, Ana Vanessa Gutiérrez, Henrique Facuriella, Pablo Rodríguez Medina, Ana Rosa Fernández…“. El pasu siguiente daríase en 1998, cuando un hermanu del propiu Chechu García abre’l pub y acuta nél un reserváu a la entrada pa poder tertuliar. Apúntense asina delles persones pente les que destaquen Xulio Arbesú, César Rodríguez, Ana Rosa Fernández, Enedina la bibliotecaria de L’Entregu, Patricia Laviana o Roberto Corte, al que García conocía del mundu del teatru.
García tamién da cuenta de les persones que foron amestándose a la tertulia nos siguientes años. Persones como Patricia Laviana, Susana Carreño, Ana Vanessa Gutiérrez, Xurde Álvarez, Antonio Riopedre, Xuan Carlos Lanchas, Alfonso Zapico o Laura Marcos. Persones que foron y volvieron, delles que quedaron, pero que, con too, dieron vida a una institución que – mui probablemente – tien pinta de que va sobrevivilos a toos.
Una llocomotora cultural (y abierta a toos)
Ta claro, una tertulia cultural, tien muncho siempre de motor, d’afalar l’intercambeu d’idees y de, en xeneral, per aciu del diálogu, actuar como motor cultural y ideolóxicu d’un grupu d’escritores. Casos documentaos n’otres lliteratures hai bien d’ellos, pero la Malory ye quiciabes la única tertulia n’activu (y, en tou casu, la de más llonxevidá y importancia) de les lletres asturianes. Dende 1998, tolos vienres ensin esceición, la Tertulia aconceya pa falar de too: dende la vida a la política, pero sobre manera de lliteratura y, más concretamente, de lliteratura asturiana.
José Luis Rendueles descríbelo: “Cuando yo llego suel tar Robert tomando un café y lleendo la prensa, ponénonos al día de cómo foi la selmana y según van llegando los demás van saliendo temes pa charrar, unos a cafés, otros a birres y otros a pintes de vino. Chárrase de too, pero muncho de llibros”. Solinca Turbón sostién qu’en Malory “somos una tertulia atípica porque nun tenemos un pope al que siguir nin que siente cátedra, ye mui democrática podríamos dicir, tamos toos nel mesmu planu y toos aporten coses”.
date cuenta, una ventana al mundo de la cultura onde vas conocer llibros, onde te van aconseyar de cine, de formes d’encuadernar, de variedaes de navayes…, vas sentir y deprender de too. Chechu garcía ta d’alcuerdu: “Siempre foi una tertulia abierta, llegues, presénteste y oyes lo que se diz, fales y si tuvisti a gustu, repites al otru vienres”; anque solliña que nun tuvo pensada como una “tertulia d’escritores, nin una tertulia en llingua asturiana”, anque col pasar del tiempu cuasi tolos miembros acabaron asoleyando obra n’asturianu.
Otra de les coses importantes de la Tertulia Malory ye l’apertura. Nun se trata d’un club zarráu al que namás se ye a entrar si te conviden: Toles persones rellacionaes cola lliteratura son les bienllegaes anque, eso sí, los integrantes insisten en que faen falta “Más muyeres pa ver si algamamos l’equilibriu” y que, anque ún nun pueda siguir viniendo por razones de la vida “nun dexa de ser nunca un malorín o malorina”. Solinca Turbón coincide con Rendueles, y echa en falta la xente mozo: “Tolos años suelen pasar media docena d’autores que vienen una vez o dos y dempués nun tornen. Cualquiera ye bienveníu porque trae idees distintes y nueves. Y si de min dependiera traería más xente mozo”.
¿Una xeneración Malory?
La entruga ta nel aire. Si los historiadores de la lliteratura asturiana coinciden toos en que les páxines de Conceyu Bable foron l’aniciu de la xeneración que se llamó “Surdimientu”, la entruga sobre si tamos énte l’aniciu d’una nueva xeneración ta nel aire. Pa persones como José Luis Rendueles ta fuera de toa dulda que non, la tertulia Malory nun pue ser una xeneración: “Los criterios pa falar d’una xeneración van más allá d’un grupu de collacios d’edaes dispares ya intereses afines como podemos ser nosotros”, sostién la escritora.
D’otra manera velo Solinca Turbón, qu’a la entruga repuende que sí: “¿Por qué non? Pela tertulia pasó muncha xente de polo menos dos xeneraciones del surdimientu”. El fundador, Chechu García, sitúase ente les dos posiciones y diz que “si lo mires dende la Cuenca, sí [ye una xeneración]. Pero a nivel d’Asturies paezme que somos un poderín más, unu que trabaya con muncho amor pola cultura y la llingua asturianes”. No lliterario diz que “si hai dalgo que mos xune ye que toos mos mandamos del asturianu y tenemos una visión común de l’actividá cultural, de visibilizar la lliteratura, de tar activos y nun ser namás espectadores de lo que pasa“. Y fala de que nun se reduz namás a lo lliterario, sinón qu’acaben tocándose otros temes como lo musical, lo teatral o lo artístico.
Xeneración o non, lo que ta claro ye que les persones que pasaron pela Tertulia Malory acabaron dexando buelga na lliteratura asturiana. L’académicu de la llingua Pablo Rodríguez Medina, el tricampeón del Xosefa Xovellanos Xulio Arbesú, el bicampeón del Máximo Fuertes Acevedo José Ángel Gayol, la ganadora del Fernán Coronas 2019 Laura Marcos… y toa una riestra d’escritores premiaos en tolos xéneros. Poques duldes hai de que’l café Tom Malory ye en 2020 ún de los llugares de mayor importancia cultural d’Asturies por toles hestories que se texen, perfilen y falen nél. ¿Xeneración o non? El debate ta abiertu…
Muncho más qu’una tertulia
Pero la Malory nun ye namás una tertulia “al usu”. Al contrario, l’ensame d’escritores qu’ideare Chechu García convirtióse en muncho más que nuna serie de parolaes al pie d’una cerveza o d’un café. La Tertulia Malory entamó en 2011 años una serie de premios a los meyores llibros n’asturianu, una suerte de premiu Goncourt a l’asturiana, que nun tien nada asemeyao y que val pa reconocer los méritos de la obra publicao na nuesa llingua.
Meyor llibru n’asturianu del añu 2019: Memoria de Tuña de Antón García
Meyor llibru n’asturianu del añu 2018: Incorrectos de David Artime
Meyor llibru n’asturianu del añu 2017: El llibru póstumu de Sherezade de Raquel F.Menéndez
Meyor llibru n’asturianu del añu 2016: Lluvia d’agostu de Francisco Álvarez
Meyor llibru n’asturianu del añu 2015: L’aire ente la rama d’Ángeles Carbajal
Meyor llibru n’asturianu del añu 2014: Más espeso que l’agua de Consuelo Vega
Meyor llibru n’asturianu del añu 2013: Carne de melandru de Milio Rodriguez Cueto
Meyor llibru n’asturianu del añu 2012: La Chelita de Ruma Barbero
Meyor llibru n’asturianu del añu 2011: La ñeve del Cuquiellu de Xabiero Cayarga
Llama l’atención cómo polo xeneral el Premiu Malory al meyor llibru n’asturianu nun suel repetir los que premia la conseyería, valiendo pa poner munches veces el focu en llibros menos d’una altísima calidá que son yá referente lliterariu como asocede cola novela Incorrectos de David Artime o’l poemariu El llibru póstumu de Sherezade de Raquel F. Tamién, el criteriu de la propia Tertulia Malory a lo llargo de los años foi’l de nun premiar a los sos propios miembros. Ta claro qu’al evitar cayer nel auto-bombu, acabó afitándose como un premiu de munchu prestixu nes lletres asturianes pol que cada añu hai más espectación.
La Revista Reciella Malory
Pero nun acaben les coses col prestixosu premiu Malory. La Tertulia tien feches munches otres coses, como por exemplu homenaxes al grupu Camaretá, xornaes pola oficialidá o, aínda más importante, una revista que tien continuidá nel tiempu y lleva yá seis númberos que van del 0 al 5. la Reciella Malory.
Namás nel últimu númberu la revista contó con nada menos que 32 nomes d’autores asturianos pente los que destaquen nomes como Lourdes Álvarez, Consuelo Vega, Antón García y Xuan Bello o otros más mozos como Xaime Martínez y Diego Solís.
La Tertulia Malory d’anguaño fórmenla Solinca Turbón, David Fernán, Lluis Aique Iglesies, Xulio Arbesú, José Luis Rendueles, Chechu García, Pablo Rodríguez Medina, Henrique Facuriella, Laura Marcos y Roberto Corte. La Tertulia Malory ye como una d’eses vieyes llocomotores de vapor que llevaben el carbón pela Cuenca. Nun hai yá carbón nin vapor, pero sí una llocomotora que tira de la cultura. Dende Refuelgu! deseámos-y munchos éxitos pa otros tantos años más como los que lleva.
