Tever ye, amás de gaiteru, informáticu y eso nótase nel tipu de proyeutos qu’entama. Va un tiempu presentare’l so videoxuegu Gaita Hero del que falemos nesti artículu; y agora ta acabante de llanzar un crowdfunding pa montar “Chalga”, el primer taller de creación d’instrumentos musicales con impresión 3D en Teberga.

¿Hai demanda d’instrumentos 3D?

Nel nuesu casu vamos faer soluciones qu’enantes nun había polo que tamos entamando un camín nuevu. Ye cierto que xenera interés, tengo unos 30 pedíos de flautes XIBLA, de dixitación de gaita asturiana, que
surdieron antes del crowdfunding.

Diseño de XIBLA - Flauta con Dixitación de Gaita Asturiana
Diseñu de XIBLA, una flauta con dixitalización de gaita

¿En qué son meyores los instrumentos 3D en rellación a los tradicionales? ¿Calidá o preciu?

Un trabayu fechu por un luthier artesanu de gaita asturiana ye la meyor ferramienta pa los gaiteros o los tambores fechos polos facedores artesanos. El nuestru oxetivu nestos cimeros pasos ye faer soluciones
qu’ayuden a entamar a tocar los nuesos instrumentos musicales de la tradición enantes de pasar a les gaites y tambores tradicionales. Ye cierto que col 3D podemos faer soluciones más económiques y ye d’una de les nueses fortaleces, pero queremos algamar la meta de que tolos guah.es y persones que quieran averase a la música tradicional puedan faelo ensin faer grandes inversiones y con bonos medios.

Amás de la impresión 3D, busques crear un ambiente de trabayu pa los profesionales de la música y un llaboratoriu d’investigación: ¿Qué significa esto exautamente?

Fae dalgunos años en Galicia ficieron el Obradoiro Escola de Instrumentos Populares de Vigo y foi un espaciu pa conocer, trabayar y estudiar los instrumentos de la tradición. Foi un espaciu pa músicos, luthieres y alumnos onde toos pudieron trabayar nos sos niveles. Prestaríame que los artesanos asturianos pudieren usar el nuesu taller pa faer pruebes d’aquelles coses que, nel día a día, nun puedan faer. Pa mí el progresu nun ye real si nun llega a los mios compañeros.

“Pa mí el progresu nun ye real si nun llega a los mios compañeros.”

Fales d’innovación musical. ¿Refiéreste a revoluciones técniques como puen ser coses como la “gaita midi” d’Hevia? ¿O refiéreste más al tipu de soníu?

Nesti casu falamos de les dos coses. Queremos faer un “punteru MIDI”, que ya existen varios nel mercáu, pero’l nuestru queremos usalu col ordenador pa desendolcar soluciones software pa poder usalu.
Pa qu’esi punteru seya útil necesitamos tener soníos reales del nuesu instrumentu. Imaxínome a una nena de 7 años fayendo los sos primeros exercicios de gaita col punteru MIDI mientres yá pue escuchar los soníos de la gaita bien afinaos, pa mí esto ye un gran pasu si lo algamamos, ya que podríamos trabayar colos nenos bien ceo.

“Imaxínome a una nena de 7 años fayendo los sos primeros exercicios de gaita col punteru MIDI mientres yá pue escuchar los soníos de la gaita bien afinaos”

¿A qué tipu de xente ta empobinao? ¿Músicos consagraos o xente que quier deprender?

Pa la xente que va deprender ye faer del so primer contautu cola tradición una esperiencia que-yos aporte valor y puedan medrar de manera constante col ritmu que se marquen. Que’l primer día de clase vaigan pa casa tocando un par de canciones bien tocaes a mí faeme feliz y vien a enseñanos que l’habilidá musical ta dientro de ca ún de nosotros. Pa músicos con más nivel vamos dir proponiendo otres soluciones col fin de que puedan faer otros tipos de proyeutos musicales, por exemplu, facilitar les producciones musicales a xente del mundu tradicional que quiera asoleyar los sos trabayos.

“Pa músicos con más nivel vamos dir proponiendo […] por exemplu, facilitar les producciones musicales a xente del mundu tradicional que quiera asoleyar los sos trabayos”

Tever posando con diferentes pruebes de flautes ya punteros en 3D

Cuentes que’l conceyu de Teberga ta sofitando’l proyeutu poniendo un espaciu físicu pa él. ¿Paezte que polo xeneral el sofitu de les alministraciones pa la música ye bonu o podría ameyorase?

Nel mio caso particular, el conceyu de Teberga y el conceyu de Proaza, que son colos que toi nel día a día son un pilar nes nuestros trabayos ya siempre sofiten nuestres propuestes polo que pa mí ye muy importante’l so apoyu. Nuna visión más xeneral nel conxuntu d’Asturies hai propuestes que se
respeten en festivales, talleres o investigaciones que fai la xente y les asociaciones, pero pa mí hai un problema que nun somos capaces, entovía, de camudar la visión de la xente. Asturies como rexón tien una bayura de cultura, fiestes, mitoloxía, gastronomía… ente otres coses que nun-y damos el valor que realmente tien ya eso fae que en munches vegadas les propuestes que se faen nun algamen a comprendese o a dayos el valor real que tien.

Na cultura asturiana hai siempre resistencia pa con tolo que signifique avance y tamién xente que ve con bonos güeyos cualquier tipu d’avance. ¿Cómo ta siendo l’acoyida?

Fae unos años nel mundu la gaita entamamos a faer diferentes estayes d’investigación al rodiu del nuesu instrumentu y al repertoriu tradicional que faemos. Un exemplu ye’l trabayu de Pedro y Diego Pangua “En ca’l gaiteru” onde estudien diferentes gaites que s’usaron na tradición y toquen con elles pa probar les técniques que se pueden faer con ca una. Otra llinia ye la de faer repertorios de nueva creación que faigan que la gaita amplíe les sos sonoridades y va rellacionao con usos de los luthieres asturianos de llaves, como pue ser un clarinete, pa facilitar l’usu de notes musicales que munches vegaes son complexes d’executar. Pa mí ye perimportante les dos visiones, rescatar lo que faíamos y seguir innovando pa que la gaita siga medrando. Que faigamos trabayos neses dos víes pa mi son bones noticies, fala de que la gaita y la música de base tradicional ta viva.

Va poco llanzara Rodrigo Cuevas un proyeutu pa recuperar un teatru en L’Infiestu, y equí tamos falando d’entamar un proyeutu mui potente en Teberga. ¿Hai blimes pa que proyeutos en llugares tan poco poblaos seyan caltenibles? ¿Tamos énte una nueva revolución de lo rural?

Los nuevos medios teunolóxicos abrieron nueves víes pa enfocar el trabayu n’estos entamos del sieglu XXI. Nel mio casu del 3D con un ordenador ya un par de impresores puedo faer trabayos de gran calidá que enantes riquíen maquinaria ya medios muncho más caros que los que voi a usar. Siendo asina pa mí la clave ta en ser creativos na hora de crear les idees empresariales y pensar nel mundu rural como un mediu que pue aportanos un espaciu de trabayu maraviyosu. Oxalá seya una revolución de lo rural ya podamos caltener y recuperar espacios que tenemos nos nuesos conceyos. Pa mi ye too un arguyu
poder trabayar nel mesmu sitiu onde trabayó’l mio güelu como guardia xuráu nes mines de Teberga, siento que’l trabayu que fizu la mío familia pa dame una educación va poder aprovechase nel mesmu llugar onde ellos vivieron. Pa mí Asturies nun pue escaecese de los sos pueblos pa construir el futuru, entovía hai muncha fuercia n’ellos.

“Asturies nun pue escaecese de los sos pueblos pa construir el futuru, entovía hai muncha fuercia n’ellos”

Primero foi’l videoxuegu, agora esto. ¿Qué ye lo próximo que tien en mente Tever?

Cuando unu entra en contautu cola música tradicional empieza agüeyar como yera la música nos pueblos d’entamos del siglo XX. Antes de que aparecieren les radios o los medios de comunicación nos pueblos de Asturies baillaben y faíen toes les coses que vemos nes fiestes pero faíenlo ellos mesmos. En tolos pueblos había música nes cases: gaiteros, pandereteres, tocaben el tambor, payel.las, la botella d’anís… etc. Cola llegada de la modernidá esa realidá asturiana nos pueblos, que se remonta a varios sieglos nel tiempu, foi desapaeciendo esa música de les cases. Un oxetivu ideal na mio cabeza ye poder tornar esa música a les cases de la xente y que cualquier persona que quiera entamar a tocar la nuesa música pueda faelo con bonos medios y pueda disfrutalo dende’l primer minutu. Otru puntu que llevo con él varios años ye’l cómo llegamos a la xente xoven. Munches vegaes coles charres nos colexos paezme que nos ven a los gaiteros, tamboriteros o la música que faemos como dalgo anacrónico nes sos vides, dalgo que numalgo

ta nel so rádar de coses que faer o actividaes. Gaita Hero foi un primer pasu pero quiero trabayar la llínea de los videoxuegos y va ser otro puntu fuerte del trabayu de innovación en chalga, cuando les ferramientes físiques que faemos para aprender a tocar la música les integremos col mundu de los videoxuegos.

Munches vegaes coles charres nos colexos paezme que nos ven a los gaiteros, tamboriteros o la música que faemos como dalgo anacrónico nes sos vides, dalgo que no ta nel so rádar de coses que faer o actividaes.

Ver a los nenos y nenas garrar el mando de “la play” da-y a los botones cola habilidá cola que lo faen a mí dame a pensar que si tienen esa capacidá de mover los deos con esa coordinación, tenemos un gran músicu en potencia en cada guah.e gamer. Chalga ye’l resultáu de varios años del mio trabayu y faese realidá nun espaciu col que creo que vamos poder diseñar ferramientes que nos faigan la vida más fácil a los profesionales de la música tradicional asturiana nestos primeros pasos.

Leave a Reply

La to direición de corréu nun va espublizase. Los campos riquíos márquense con *