De Joker: Folie à Deux va una selmana que por fin tenemos les primeres imáxenes de Lady Gaga como Harley Quinn, la (nun principiu) moza del Rei Payasu del Crime. Y ye que, como la primer película del Joker nun se desendolca nel Universu Cinematográficu DC, sinón nún aparte, yá sabíemos d’amunchayá que nun diba interpretala Margot Robbie. ¿Otros detalles sobre’l personaxe que yá sabemos? Pos paez ser que nun va ser, como nos cómics o la serie de dibuxos na que ñació, la sicóloga del villanu qu’acaba namorada d’él, sinón una paciente más del siquiátricu. Y aquello que nos pilló por sorpresa, cuando anunciaron que la película diba ser un musical, paez tomar forma agora que se filtró a Twitter (equí) un vidéu nel que se siente a Lady Gaga cantando.
Per parte de The Batman 2, película a la que tovía-y queda un bon cachu pa estrenase (va empezar a rodase en payares, y nun s’espera que s’estrene hasta ochobre de 2025) pero que por suerte sobrevivió a la escamuchina que produxo la llegada de James Gunn a DC Studios, tamién nos lleguen noticies nueves. La más llamadera de toes ye que, según el portal Deadline, el gran villanu de la película va ser Clayface, un monstruu fechu de llama que pue sonavos sobre manera de dalguna de les series d’animación nes que tien salío, como la de los años noventa de Batman: The Animated Series, o la bien recién de la mesma Harley Quinn. Por embargu, esto choca enforma colo que tien dicho y fecho Matt Reeves sobre que-y presta tener un mundu más realista pa Batman, porque un villanu con poderes tan fantásticos nun acaba de casar cola so visión. ¿Quiciabes se basa na primer versión del personaxe, de 1940, que yera un actor ensin poderes, cayíu en desgracia y que cometía crímenes antroxáu d’un de los personaxes que’interpretara? ¿O una versión propia y bien distinta a toes les de los historietes, como yá fizo con Riddler? En cuantes que lo sepamos, contámosvoslo.
