Venímos contándovos un tiempu’l desastre que ta siendo pa Hollywood la fuelga de guionistes, los atrasos que ta produciendo y yá, l’otru día, que por ella dexen pa prau Metropolis, un remake del clásicu en formatu de serie que diba contar con un gran presupuestu. Y mientres la fuelga dure, nun van llegar más que males noticies al respeutive, como esta nueva que vos trayemos güei.
Va meses que tienen grabao la cuarta temporada de The Boys, la serie estrella d’Amazon. Por si vivís n’otru mundu y nun sabéis que qué va, ye una adautación de los cómics col mesmu nome (de Garth Ennis y Darick Robertson) protagonizada por superhéroes que, por dicilo suave, son mui poco exemplares: inocentes muertos como daños colaterales, que dalgunos son sicópates alloriaos o que monten orxíes que se salen de madre son solo dalgunes de les coses que la empresa dedicada a ello ha d’esconder. El casu ye que, agora que tán yá col procesu de posproducción d’esta cuarta temporada, y pa detrás coles ganes que nos dexaron al final de la tercera de saber qué pasaba, van tener d’atrasar esti y la estrena hasta orde nueva. Y ye que, davezu, cuando ven too montao deciden cambiar unes cuantes llinies de diálogu, llamar a los actores y grabales pa meteles pel mediu o pisando les que teníen. Eso, agora, ye imposible, conque la serie queda aparcada anque la tuvieren a puntu d’estrenar.
Por suerte, esto nun paez que de momentu afeute a Gen V, la serie que ñaz como pondera de The Boys (siendo yá dafechu orixinal, nun habiendo cómics nos que basase), pos nun hai noticia dala de que s’atrase y sigue esperándose pa cuando acabe’l branu (anque tovía ensin fecha concreta). Nesta serie nueva, ambientada nel mesmu mundu, van contanos la vida de los estudiantes de la Universidá Godolkin, la que tien la particularidá de ser esclusiva pa superhéroes. Como ta claro, estos metahumanos nun van ser muncho más exemplares que los adultos, lo que nos asegura que va haber un montón de sangre, sexu, drogues, bromes escatolóxiques y sobraes en xeneral. Si nun podéis aguantavos ensin ver qué pinta tien, dexámosvos l’enllaz calcando equí.
