Yera un proyeutu llonxanu, d’esos que quiciabes anuncien enantes de tiempu, y la noticia va perdiendo fuercia hasta cayer nel escaezu, Y munchu depués, un día, menten como quien nun quier la cosa, pa dicir que la producción al final quedó pa prau. Por embargu, les actualizaciones sobre’l desendolcu d’esta serie sí fueron llegando adulces, y yá va ser pronto una realidá. Llega la pondera de John Wick, la miniserie The Continental: From the World of John Wick.
Si nun vistis les películes de la saga, eses nes que Keanu Reeves interpreta un ex-asesín a sueldu que chifla cuando unos manguanes-y maten el perrín, nestes presenten un mundu secretu (y bastante complexu) nel que se mueven los asesinos profesionales. Tienen les sos lleis, una moneda propia, y tamién una cadena internacional d’hoteles nos que s’agospien, The Continental. Ún de los personaxes más importantes de les películes ye Winston Scott (Ian McShane), el propietariu del Continental de Nueva York, y con esta serie nueva vamos conocer más d’él. Siendo más específicos, de la so mocedá.
Y ye qu’esta miniserie de trés capítulos va tar ambientada nos años setenta (conque podemos olvidanos de que Keanu Reeves faiga dalguna apaición sorpresa), y va protagonizala l’actor Colin Woodell como la versión moza del personaxe. Baxo la tutela de Cormac (Mel Gibson) va dir ascendiendo nel mundu criminal, suponemos qu’hasta facese col control del hotel.
Lo meyor de too, pa nuesa idea, ye que nun paez que tea ambientada nos años setenta namás por cumplir, pa encaxar la hestoria na de les películes, sinón que va aprovechar lo máximo les modes de la época: la blaxploitation, les artes marciales y la música setentera van amestase a l’aición tan desenfrenada y peculiar de la saga.
Estrénase yá en setiembre, n’Amazon Prime. Dexámosvos l’avance, que la verdá que ye ablucante, calcando equí.
