Ensin cuasi avisu, acaben d’estrenar en Netflix una seriuca de superhéroes de la que lo más seguro ye que nin oyereis falar. Llámase The Guardians of Justice y la verdá que ye bastante pecuñar. El responsable (y ún de los actores) ye Adi Shankar, conocíu sobre manera pola serie de dibuxos de Castlevania, pero que yá ficiera galanes con curtios mui vistos en YouTube nos que versionaba personaxes bien conocíos, como Punisher: Dirty Laundry o Power/Rangers. Nesta serie nueva vuelve a los oríxenes, y ye que, anque nun tien los drechos de los personaxes de DC (nin dexaríen que ficiera con ellos lo que fai) ye bultable que da una visión propia de la nomada Lliga de la Xusticia.
Na serie alcontrámonos en 1987, cuarenta años dempués de que ̶S̶u̶p̶e̶r̶m̶a̶n̶ Marvelous Man apaeciera y acabara cola Tercer Guerra Mundial. Toos esperen el mensaxe que tresmite cada aniversariu per televisón, pero entós ocurre lo impensable: Marvelous Man suicídase en direuto. Ente l’ablucamientu qu’ello produz y la declaración de la muyer, ̶L̶o̶i̶s̶ ̶L̶a̶n̶e̶ Laura Lang, qu’asegura que lu asesinaron, ̶B̶a̶t̶m̶a̶n̶ Knight Hawk inicia una investigación pa saber qué ye lo qu’asocedió en verdá… mientres el mundu, al más puru estilu Watchmen, ta al borde d’una guerra nuclear.
Asina dicho, paez que nun tenemos equí nada nuevo, una deconstrucción más del xéneru superheroicu de tantes de les qu’hai milenta nos cómics y yá unes cuantes en cine y televisión. La gran diferencia ye qu’equí lo faen ensin tener cuasi presupuestu, y pa que nun salga un bodriu han suplilu con bien d’orixinalidá. Conque garren actores col croma darrera, animación clásica, pixel art, imáxenes trucaes de documental, stop motion, abondos efeutos especiales ochenteros y un ritmu disparáu que lo entemez too, y que dacuando pue llegar a resultar aturullador tanto como un videoclip un pocu sicodélicu de la dómina de la MTV. La influyencia de los videoxuegos y el so llinguaxe ye perclara; cuando salen el Kremlin y la Casa Blanca da la impresión de que tamos nuna cinemática al estilu Red Alert, nes engarriaes salen les barres de vida de los personaxes como nun beat’em up y cuando hai tiros vémoslos en primer persona como nun shooter. El guión, mentanto, anque nun inventa nada nin tampoco nun lo pretende, si tan bien lleváu y consigue pillate despreveníu con dalgún qu’otru xiru argumental, amás de tener esa ventaya de poder facer coses políticamente incorreutes colos personaxes por nun tener de caltener la imaxe respetosa como la compañía obligaría colos orixinales.
En resultancia, tamos énte un productu que nun va pasar a la historia, pero que pa nun gastar pretensiones nin dineru consigue un resultáu mui curiosu. Yo la verdá qu’espero que salga una segunda temporada, porque (ensin desvelar cómo) el desendolcu de la trama acaba no qu’empobinaría a caminos argumentales más inesploraos.
