Va tiempu que sigo sollerte lo que fai Anya Taylor-Joy, sobre manera no que ye’l xéneru d’horror. ¡Y eso que (anatema) nun me prestó nada The Witch! Pero sí Split, y d’horror yera, más o menos, la versión de The New Mutants na que destacó sobre tol restu del repartu. Y tamién me paeció qu’aportaba dalgo bastante nuevo Last Night in Soho, cosa difícil de facer anguaño. Ye por eso que taba naguando por ver esta película, que darréu voi contavos de qué va:
Una… ¿pareya? (nun principiu paez que nun ta mui clara la rellación) viaxa a una islla perdida en metá de la nada, a ún de los restoranes más esclusivos del mundu. Con ellos, un montonáu de señoritos, caún más repunante que l’anterior. Y ye qu’odiar a los personaxes d’una película de mieu ye esencia, pa que dempués podamos esfrutar col so sufrimientu. Y, bono, el casu ye que, según tán prebando’l menú, ente les maníes estrañes del chef (xenialmente interpretáu por Ralph Fiennes) y l’ablucante disciplina militar del so serviciu, la cosa escomienza a torcese… Ye un menú conceutal, diz el paisanu, que cuenta una hestoria, y la comida ye namás un ingrediente.
Tento de nun dicir más, paezme que yá toi diciendo abondo, porque parte de la gracia de la película ye ver cuálu ye’l platu viniente, qué espera a los comensales y cuála ye la hestoria de caún d’ellos. Masque nun pueo facer esta reseña ensin mentar que, anque la película tea bien como puru entretenimientu (tampoco voi dicir que ye una obra maestra del séptimu arte, pero sí que te tien engancháu ensin necesidá d’echar una güeyada al móvil), hai dago nella que me paez especialmente prestoso y llamadero. Y ye esa crítica, nun principiu sutil, cada platu más visible, a la sofisticación de les coses y cómo perdemos lo importante pel camín; a les esixencies absurdes de quien pue pagar un serviciu pero que nin siquiera lu entiende, y a la tensión y frustración que produz nel trabayador nun consiguir matales. Y ye qu’igual nun ye la sofisticación, sinón tolo contrario, les coses más cencielles, lo que nos fai más felices, tanto a unos como a otros.
Y si queréis saber tovía más, dexámosvos col avance (en versión orixinal) calcando equí.
