Con un presupuestu de 462 millones de dólares namás pa la primer temporada, Amazon apostó fuertísimo pola “precuela” d’El Señor de los Aniellos, pero, por muncho que tengan intentao maquillar les cifres, y mui en secreto que guarden los datos d’audiencia, The Hollywood Reporter (nuna noticia que podéis ver calcando equí) consiguió que fontes fiables-y confirmen lo que yá se comentaba: nos EEUU namás acabaron de ver la primer temporada el trenta y siete por cientu de los espectadores qu’empezaron a vela, lo que ye más grave tovía si tenemos en cuenta qu’esta constaba de solo ocho episodios. Nel restu del mundu la cifra ye un pocoñín más alta, un cuarenta y cinco por cientu, pero na canal nun consideraben un resultáu decente que nun algamara pelo menos el cincuenta.
La xefa executiva d’Amazon Studios, Jennifer Salke, afirma de toles maneres que nun hai nenguna conversación interna na que se considere que ye un fracasu, y que, masque la primer temporada precisó muncha preparación, les vinientes van costar menos dineru (les cinco temporaes tán presupuestaes nun total de mil millones de dólares, amás de los doscientos cincuenta que costaron los drechos de la obra de Tolkien, o que la fai la serie más cara de la historia).
Ente los showrunners de delles series, por embargu, comenten a THR que falta una direición clara na canal que los empobine hacia oxetivos claros, que se sienten al debalu, a lo que Salke respuende que nun quier llendar la creatividá de los artistes nin centrase nun target concretu.
Per otru llau, les crítiques del públicu nun ayuden a que la serie trunfe, pos los cambios que ficieron, dellos por nun tener drechos sobre delles obres de Tolkien, dellos pa representar una mayor diversidá y emponderamientu, tienen producío unos cuantos revuelos ente los fans más ríxidos. Ente ellos, el mesmísimu Elon Musk, qu’usó la so rede social pa criticar que Galadriel yera un personaxe demasiáu perfeutu (lo que suel apodase una “Mary Sue”) y afirmar que Tolkien taría removiéndose na sepultura.
Seya como seya, el casu ye qu’Amazon, por muncho que diga, nun ta teniendo cola serie’l resultáu qu’esperaba.
