Con unos ingresos qu’algamaron esta fin de selmana nada menos que doscientos cuatro millones de dólares, namás nos Estaos Uníos, The Super Mario Bros. Movie apunta a convertise na película d’animación con más recaldación de la historia. Consiguió más ésitu que Frozen 2, hasta agora la que tenía la medaya d’oru na meyor estrena d’animación, y ye la segunda meyor estrena de cualesquier película dende l’andanciu (dempués de Spider-Man: No Way Home).
Asina, anque tamién ye verdá qu’en Xapón s’estrenó va un par de selmanes, la película tien recaldao yá, a nivel internacional, más de trescientos setenta y cinco millones. Una fin de selmana llarga, colos festivos, pudo ayudar bastante, pero ta claro que tamién tenía coses a la contra como les males crítiques de profesionales; “un entretenimientu baxu en caloríes”, “una deceición al altor de la primera” (refiriéndose a la película d’aición real de los años noventa), “como dase un paséu por Toys R US”, “ye como tar de pies viendo a otru xugar a un videoxuegu”, o “una película tan vacía como un avance” son namás delles de les reaiciones espublizaes en grandes medios, y mientres que la votacion del públicu en Rotten Tomatoes ye de 9,6, la de la crítica ye de 5,7. Lo que ta claro que nun ye una película pa tolos gustos.
The Super Mario Bros. Movie ye la segunda adautación al cine del la famosa saga de videoxuegos, la primera d’animación y la primera d’esti sieglu. Pa les voces n’inglés contrataron grandes actores, como Chris Pratt pa facer de Mario, Anya Taylor-Joy pa la Princesa Peach y Jack Black pal villanu o monstruu final, Bowser. Ta fecha en collaboración ente Universal y Nintendo.
