Tiense falao d’ello, pero yá ta confirmao qu’Amazon va estrenar en 2024 The War of Nohirrim, una película d’animación ambientada ente la saga orixinal de Tolkien y la serie-precuela The Rings of Power. Sábese yá, de fechu, hasta l’elencu de voces, nes que destaquen Brian Cox (Sucession) como Helm Hammerhead, novenu rey de Rohan, y Miranda Otto (Éowyn nes películes de Peter Jackson).
L’anime ta pensáu como un complementu a la hestoria orixinal, allugándose l’aición dos sieglos y mediu enantes. Masque paez n’arte conceutual que la estética ta mui basada na de les películes de Warner, y nel equipu de trabayu hai nomes en común con elles, ye verdá qu’Amazon nun tien drechos sobre elles nin sobre dellos testos de Tolkien, conque’l material nel que pue basase ta cuasi tan llendáu como’l de la serie, que yá tien recibío crítiques, en parte polos cambeos que se vieron obligaos a facer.
La película va dirixila Kamiyama Kenji y producila Joseph Chou (que collaboren amunchayá n’obres como Ghost in the Shell: SAC_2045, Ultraman o Blade Runner: Black Lotus), y el guión ta a cargu de Jeffrey Addis y Will Mathews (The Dark Crystal: Age of Resistance).
