Va unos años que miren de facer lo que podríemos considerar un soxéneru nuevu entemeciendo horror sobrenatural con drama racial. Get Out, Lovecraft County, Penny Dreadful: City of Angels… Pa mio idea, nenguna nun lo fixo acordies. La primera d’estes, Get Out, arriendes de tar chapada n’otra película (enforma menos conocida, anque nun vamos mentala porque ye fastidiar la so final), foi más bien una hestoria d’horror más, anque alliñada con un mensaxe que pue resultar un pocoñín simplayu. D’otra manera, la segunda y la tercera abulten drames raciales dafechu, masque a cachos surdan fuercies sobrenaturales que la verdá que nun paecen venir mui a cuentu nin dicir colo demás, como si andaren a saltos ente un xéneru y l’otru. Nun ye fasta Them, la serie que sacó esti añu Amazon Prime, que vemos que’l xéneru ñaz como talu, siendo a lligar dambos dos elementos nuna mestura homoxéneo.
Perguntaréisvos de qué trata. Asitiada nos años cincuenta, amuésanos cómo una familia afroamericana fuxe de l’América más cerril tres d’un socesu espantible, y con toles esperances puestes nuna vida nueva en Los Ánxeles. Por embargu, nun son bienllegaos nel barriu blancu nel que finquen, y amás del atortoramientu y les amenaces de los vecinos (por si foren poco), escomenzarán a atemorialos unes visiones horroroses. Bultablemente, tanto unes coses como les otres van diendo a más según avanza la serie, provocando una tensión acongoxadora fasta too arreventar.
De xuru qu’al escomienzu va veninos una dulda: ¿lo que ven son bisarmes, o ye que tán alloriando? Sicasí, la verdá ye que nun da más; les metáfores, lo que representen aquelles figures tenebroses, son potentes por demás como pa siguir rucándose munchu tiempu por custión tala, y la serie gárrate y arrástrate p’hacia esi mundu que si resulta terrible ye por saber que lo esencial foi daqué qu’ocurrió daveres; nel que les pantasmes nun meten más mieu que la xente “normal” y u sientes que los protagonistes (y tola xente real que representen) son héroes masque lo único que faen ye lluchar por querer vivir como los demás.
N’estilu nótase abondo la influyencia de la blaxploitation setentera, tanto nos planos como na música y nos títulos d’abertura y zarru, dando-y un aire retro que perconcasa cola hestoria (anque, paradóxicamente, la música seya anacrónica) y la engarcia na cultura cinematográfica afroamericana. Ensin desvelar más nada, dicir que quiciabes la final ye lo qu’a menos públicu convenza, pero siendo una serie antolóxica d’estes qu’agora tán tan de moda, nes que cada temporada cunta una hestoria distinta y con otros personaxes (anque la temática siga siendo la mesma no fondero), munchos yá naguamos por ver qué nos van amosar na segunda.
