De mano, he dicir que nun pudi con Ragnarok, la que foi la película anterior de Thor (la tercera) y que tamién dirixía Taika Waititi. Nun sé dicir bien por qué, agora camiento que quiciabes namás que yera mui distinta a lo qu’esperaba, y el choque coles espeutatives foi demasiao fuerte p’aposentalu primero de quitala. La verdá que’l cambéu de tonu cola anterior yera de cientu ochenta graos, y yá esi empiezu de chistes malos entróme per mal sitiu. Pero pueque, sabiendo yá lo que m’esperaba, y en faciéndome a Waititi cola maraviyosa Jojo Rabbit, o pueque porque salíen los Guardies de la Galaxa, polos que tengo debilidá, encaré esta continuación con otra mirada. Y nun m’arrepiento, porque la verdá que nun me paeció que tuviera nada mal.
Ye verdá que, masque nun ye raro’l sentíu l’humor nos cómics del personaxe, nun tengo visto nellos una dosis tan alta nin p’atrás. Cierto ye, tamién, qu’ello quita dramatismu a les motivaciones dramátiques del villanu y a la enfermedá terminal de Jane Foster, la segunda (y “poderosa”) Thor. Pero masque’l drama entre ente chiste y chiste, Waititi ye quien a nun desanicialu, y a min la verdá qu’hai momentos que me ficieron respigame, lo que nun me pasa por demás. Arriendes de… ¡qué degorrios, nun va ser too drama y escuridá! ¡Pa eso pues ver películes de Snyder! ¿Nun veníes a una de Marvel? Pos esi ye’l tonu, anque nesta más esaxerao.
A la película cayéron-y bien de palos, por esto que comentamos, tamién porque dicen que “Thor” ye un nome propiu y nun pue tenelu una muyer, por facer ridículos y cómicos los dioses olímpicos, con un Zeus fartón… “¿Cuándo nos convertimos nun chiste?” dicen na escena poscreitos. Hai quien apregona qu’esta venida a más del humor ye’l principiu de la final del xéneru superheroicu, porque cuando un xéneru empieza a autoparodiase yá comienza la cuesta abaxo. Pero “los muertos que vuesamercé mata gocien de mui bona salú”, y por más que se repita eso ye una teoría que ta por probar. La verdá que yo agradezo que dexen a los direutores dar un toque personal a les superproducciones, porque davezu tán tan llendaos pola fórmula l’ésitu (y agora, tamién, por facer casar les películes cola continuidá afitada y los proyeutos futuros) que nun-yos dexen movese con un mínimu de llibertá. Nel casu de Waititi, esa llibertá pasa por dir más allá no que munchos critiquen a Marvel, de tomalo too a chunga, pero amás de que funciona (masque pal personaxe de Thor, en particular, yo pidiría más d’épica) pienso que pue dar vía llibre a otros “toques” qu’espero que tengamos. Hai quien critica que Doctor Strange in the Multiverse of Madness yera demasiao de Sam Raimi, y yo que quixi vela tou ilusionáu precisamente por ello acabé bastante deceicionáu. Conque equí tenemos un pasucu hacia películes de superhéroes un poco distintes, de manera qu’un día igual apaez dalgo radicalmente distinto, nel qu’a un direutor con una personalidá marcada-y dexaren facer dalgo dafechu a los sos deleres. Yo, si nos ponemos a pidir, a L’Anguleru o a quien seya, pidiría-yos un Spider-Man cola maxa de Wes Anderson, un Nick Fury sicodélicu de David Lynch, unos Héroes d’Alquiler setenteros dirixíos por Tarantino… Oxalá llegue esa decadencia que tanto anuncien los agoreros, porque sedría la hora de que Marvel Studios arriesgue más, y yo puea ver dalguna d’eses maraviyes coles que suaño.
