Que les redes sociales son daqué qu’evoluciona ye daqué que ta claro, y tamién qu’unes tán de moda un tiempu y suel venir otra que les supera y dalgunes muerren (esti ye’l casu de del yá desapaecíu Tuenti). Delles tamién van espoxigando y añadiendo funciones nueves, que dependiendo del sofitu que tengan caltiénense o elimínense (como ye’l casu de les histories de Twitter).
Dependiendo de la xeneración (pero esto nun ye una llei obligatoria) tamién paez qu’usamos unes más qu’otres: si la xeneración millennial (por tomar una fecha de referencia, los que nacieron ente’ 1985 y 1997 aproximadamente) yera la más esperta en rees sociales como Instagram y Twitter, la siguiente, los siguientes son los espertos en Tiktok.
Ye difícil desplicar lo que ye Tiktok, lo que si podemos dicir ye que lo que se sube a Tiktok son videos en vertical y polo xeneral curtios (nun pasen del minutu). Ye talu l’aciu de Tiktok que ya podemos atopar a vender pantalles d’ordenador verticales. Esta rede yá superó los 3000 millones de descargues.
Magar lo que podáis pensar de lo xoven que ye esta rede, la realidá ye que ya s’usa dende 2017. Tiktok desendolcóse a partir d’otra rede que se noma Douyin y que ye igual pero solo pa China. Agora úsase pa too: dende xente faciendo coreografíes, recetes de cocina, procesos de dibuxos o artesanía….tolo que puedas maxinar va tar ehí.
Amás, existen unos trend y challenge, que polo xeneral consisten en facer una determinada coreografía o cambiu de ropa con una canción o soníu determinada. Dalgunos d’estos retos o tendencies surden de casualidá, pero otros son inclusive pagaos por compañíes o celebraciones.
La rede de los centenniels (y de más xente)
Volviendo a los usuarios, como yá diximos, ye la rede favorita de la xente mui mozo (que por cierto, reciben el nome de centennial). Esta xeneración yá nació col teléfonu móvil, y espoxigó coles pantalles táctiles. Son una xeneración con una gran habilidá nel usu de les teunoloxíes, y que t’editen nun momentu un videu dende’l móvil ensin nenguna dificultá. Les cifres de siguidores nes que se mueven puen llegar a ser pergrandes: nun ye mui difícil atopalos con más de 50.000 siguidores y en dalgunos casos munchísimos más, lo que los convierte n’influencers.
Como too, tamién hai que tener curiáu. Magar que munchos menores d’edá tengan esta rede social (y otres) en público (ye dicir, que cualquiera pue ver el to conteníu), nun dexa de ser una ventana pa que xente con intenciones duldoses tenten d’establecer contautu cola xente mozo. Ye recomendable que la xente menor tenga estes cuentes en mou priváu (ye dicir, qu’haya que solicitar accesu pa ver el so conteníu), y pa la xente en xeneral nun dar nengún tipu de datu que pueda facilitar el sitiu nel que vives o trabayes. A la fin, nun se sabe quién va tar al otru llau de la pantalla comentando.
Otru de los problemes que ta amosando esta rede (anque nun ye esclusivo d’ella), ye que nun almite nenguna llingua que nun seya l’español, y dafechu hebo delles iniciatives pa que dexara pero nun lo aceptaron. Sicasí, esto nun ye una torga pergrande pa los creadores de conteníu nel restu de llingües d’España, y podemos atopar a xente creando conteníu (ya inclusive clases pa deprender otres llingües) en catalán, vasco, gallegu, euskera o asturianu. Si vos interesa, Andrés Toro, que ye collaborador de Sentir Asturies, enseñanos dende Colombia a falar n’asturianu na so cuenta (@andtorma). Que la distancia nun seya un problema.
Poco más queda que contar de Tiktok, namái qu’echéis una güeyada, que de xuru qu’atopáis conteníu que vos interesa.
