Nuna entrevista a Independent acabante salir del fornu (que podéis lleer calcando equí), el prolíficu direutor Tim Burton señaló’l peligru que tienen les imáxenes creaes por intelixencies artificiales pa la producción d’animación, categoría cinematográfica de la que tien realizao unes cuantes películes.
De fechu, sintióse mui ofendíu cuando’l portal Buzfeed espublizó un artículu nel qu’amosaben como sedríen delles princeses Disney de faceles él mesmu (lo que tamién podéis ver calcando equí). Sobre ello, declaró lo siguiente:
“¡Tuvieron una IA faciendo versiones míes de personaxes Disney!“, comentó con espantu. “Nun pueo espresar la sensación que te mete. Recordóme a cuando otres cultures dicen “nun me saques una semeya porque me robes l’alma”. Lo que fai ye sorbete dalgo. Necesita dalgo de la to alma o psique; eso ye mui perturbador, sobre manera si tien que ver contigo. Ye como un robó robándote la humanidá, l’alma“.
Asina, el direutor ye otru críticu con estos programes, calcando amás no más polémico d’ellos: Que depriende usando imáxenes d’autores con obres protexíes por drechos d’autor, y que por tanto habríen dar permisu pal usu d’estes y, munchos apunten, paga-yos por ello.
N’otru orde de coses, tamién acabó yá de rodar Beetlejuice 2, la continuación de la famosísima película de los años ochenta, y ta contentísimu col resultáu:
“Esfrutéla muncho. Intenté volver al principiu, a lo básico. (…) Recordóme por qué me presta facer películes.“
Por embargu, el procesu de posproducción va ser llargu, y nun veremos la película nos cines hasta dientro d’un añu.
