Anque yá hubo unes cuantes versiones n’aición real de Los Cuatro Fantásticos (la de Roger Corman, que consideraron tan espantosa que nun estrenaron pero a la qu’agora tenemos accesu, les dos de Tim Story de principios de sieglu y la más recién Fant4stic, de 2015, más basada na versión Ultimate y a la que-y dieron pa fregar), la llegada d’estos al Universu Cinematográficu Marvel ta causando munchu revuelu, y va tiempu que se ruxe sobre quién podría facer cada papel. Los pidimientos en redes de que John Krasinsky y Emily Blunt ficieren de Mister Fantastic y The Invisible Woman paecieron garrar fuercia al salir Krasinsky como Richards en Doctor Strange in the Multiverse of Madness, pero yera una versión d’un universu alternativu y yá ta confirmáu (sacante que lo guarden como sorpresa) que nun va ser el protagonista de la versión nueva.
Por embargu, hai dellos nomes que tán espardiéndose muncho pelos portales de noticies, como los de supuestos escoyíos que nun podríen dicir nada tovía por ser confidencial, o de xente que los productores tienen nel puntu de mira pa facer los papeles. ¿De quién se fala? Dalgún nome ye de lo más llamadero. Vamos con ellos.
De mano, pa facer de Reed Richards, el cabezaleru y xeniu científicu con carne llástico, el nome que más se comenta ye’l d’Adam Driver, sobre manera conocíu por ser Kylo Ren na triloxía nueva de Star Wars. Pa la Muyer Invisible, Susan Storm, fálase de Jodie Comer (vista en Free Guy y The Last Duel, ganadora d’un Emmy y un BAFTA por Killing Eve). De l’Antorcha Humana ye de que se tien menos idea; hai una campaña en redes pa que lu encarne Austin Butler (Elvis na recién película biográfica del cantante) y tamién hai quien apunta a Dacre Montgomery (Stranger Things). Sobre Ben Grimm, el miembru más grande y rocosu del grupu, ta una de les noticies más llamaderes, y ye que polo que se ve nun tán preocupaos porque seya un home o una muyer, namás porque seya xudíu o xudía, talamente como’l personaxe. Esto y que’l direutor, Matt Shakman, quedara a comer con Mila Kunis, fizo pensar a toos qu’ella yera la escoyida. Sicasí, ella ñégalo, anque nun podría afirmalo de selo (pola mor de les cláusules de confidencialidá).
Al respeutive del villanu, fálase de qu’esti sedría Galactus, la entidá cósmica que s’alimenta de la enerxía de planetes enteros, dexándolos ermos, y la persona que supuestamente lu interpretaría sedría nada menos qu’Antonio Banderas. Oi, y si hai Galactus… ¿nun taría’l so heraldu Silver Surfer? Tovía nun sabemos nada d’ello.
Sicasí, esto hai que lo tomar como lo que ye, namás rumores, anque dellos vengan de páxines con bones fontes y que yá tienen acertao en pasáu.
