Estes nun suelen ser feches d’anunciar xuegos nuevos, pero a Microsoft da-y igual y acaba trayer un especial enllenu d’avances colos xuegos que van salir ceo pa Xbox y Windows. ¿Cuálos son estos? Nun vamos andar con introducciones, ponémonos na xera de contávoslos porque hai un bon puñáu de los que falar…
Like a Dragon: Infinite Wealth
La franquicia de Yakuza ta últimamente diendo per sitios un poco raros, yá lo fizo con Like a Dragon y sigue faciéndolo con esta continuación. ¿Por qué dicimos raros? Bono, paez que la saga ta dexando un poco pa prau les coses típiques de gángsteres pa transformándose nuna especie d’Animal Crossing, nel qu’andamos pehí atropando coses, decorando cases y rellacionándonos colos vecinos. Como podéis ver nesti avance que vos dexamos equí, nun ye que pinte mal, pero un poco raro sí que ye.
Robocop: Rogue City
Por fin va llegar esti xuegu, tres sufrir dellos retrasos, pero la verdá ye que tien una pinta estupenda pa tolos fans de les películes orixinales. Por supuestu, tamos énte un shooter, que pa dalgo encarnamos a un policía cyborg, y nél vamos enfrentanos a la gandaya típico de tola vida y a “monstruos” más peligrosos como’l míticu robó de la saga ED-209. Esti xuegu sal yá la selmana viniente, y tamién pa PS5. Dexámosvos esti últimu avance (¡de ventidós minutos!) calcando equí.
Dungeons of Hinterberg
Un xuegu de mazmorréu bastante llamaderu, tanto pol estilu cartoon de los gráficos como por tar ambientáu nel presente, nun hotelín un poco hipster de los Alpes Australianos. Eso nun va quitar, claro, qu’haya monstruos, fechizos y tolo propio del xéneru. Dexámosvos l’avance equí. PA esti nun tenemos fecha, namás que va salir pa 2024.
Spirit of the North 2
Un xuegu mui esperáu polo guapo que foi’l primeru, y nel que nesta ocasión un cuervu va acompañar al raposu protagonista. Eso ye cuasi lo único que podemos ver nel avance (equí), eso y que van danos unos paisaxes tovía meyores que nel anterior. Va salir tamién pa PS5, pero nun hai fecha nenguna señalada.
Metal Gear Solid Delta: Snake Eater
D’esti remake de Metal Gear Solid 3 preséntennos un vidéu (esti) nel que vemos lo espectacular de la versión nueva, pos en cuasi venti años ameyoró enforma la tecnoloxía. Una manera estupenda d’entrar na saga pa los más mozos, y al empar de sentir señardá y pasalo bien pa los millennials. Tamién, claro, va salir pa PS5.
Y güei hasta equí, porque la verdá que son demasiaos anuncios y pensamos que ye meyor dexar tiempu p’aposentar estos primero d’anunciar otros tantos.
