Como vos contábemos ayeri, tovía nos quedaron un bon puñáu de xuegos de los que falaron, pos el XPP dio muncho de sí. Dexámosvos equí l’enllaz de la primer parte, por si nun las lleístis, y siguimos darréu con otros anuncios.
Alan Wake 2
Ún de los xuegos más esperaos del añu, pa dalún pueque de la década, pos la primer parte caltrió la memoria de munchos xugadores al usar esi entemez d’ estructura mui de serie de televisión (lo que s’aprovechó pa una potente campaña publicitaria nesta) con xuegu de sobrevivencia. Nada menos que trece años depués lléganos esta segunda parte, de la que les primeres crítiques tán falando maraviyes. Sal a la venta güei mesmo, pa Windows, Xbox y PS5. Dexámosvos l’avance del Xbox Partner Preview equí.
Manor Lords
Un xuegu d’estratexa medieval con un sistema socioeconómicu complexu, onde encarnes un señor feudal y gobiernes, construyes ciudaes, abres rutes comerciales y llibres batalles táctiques con grandes exércitos. La construcción va ser el megoyu del xuegu, y anque nun ye un xuegu históricu sí sabemos que la estética ta basada na Francia del sieglu XIV. Una de les novedaes del Xbox Partner Preview ye que nos dan fecha d’estrena, y esta ye’l ventiséis d’abril de 2024. Dexámosvos l’avance equí.
Still Wakes the Deep
Si vos presten los xuegos de mieu preparáivos, porque Chinese Room (Creadores de Dear Esther y Amnesia: A Machine for Pigs) traye esti pa que lo pasemos terrible. Un xuegu d’horror narrativu ambientáu nuna plataforma petrolífera n’agües escoceses, onde tenemos de rescatar al nuesu equipu y, al empar, enfrentanos a una creatura indescribible. Yá tenemos gameplay, y dexámosvoslu equí.
Ikaro: Will Not Die
La desendolcadora FuturLab traye un xuegu mui del palu de Velocity (¿recordáislu, un matamarcianos de va una década?). Ikaro: Will Not Die ye un xuegu d’estilu retro, frenéticu, con un montonáu de golpes especiales, lluces de neón y música electrónico pa saturanos los sentíos. Dexámosvos l’avance equí, pero tovía nun tenemos fecha de salida.
Ark: Survival Ascended
Y, a lo último, un remake gráficu d’Ark: Survival Evolved al traviés d’Unreal Engine 5, qu’acaba de llegar a PC y pronto tamién va facelo a máquines. Dexámosvos equí l’avance d’esta versión nueva na que vamos poder ver con otros güeyos esta sandbox tremada de dinosaurios de lo más peligrosos.
Y bono, valió yá, ¿non? Que nun hai perres pa tantu xuegu prestosu. Prometemos que nel próximu artículu yá tratamos otres coses más barates.
