Quiciabes Hasbro ta mirando a Mattel con envidia. Y ye que, como vos contábemos equí, l’ésitu de Barbie va trayer milenta adautaciones a película de les sos propiedaes intelectuales. Claro, los universos cinematográficos son mui apetecederos dende va unos años, y empieza a ser vezu que los cómics funcionen como campu de pruebes pa tantiar posibilidaes distintes.
Esi ye’l casu, paez, de les nueves series d’historietes de Skybound, el sellu de Robert Kirkman (The Walking Dead, Invencible), qu’anuncia delles series coles que va esplorar la interaición ente les dos franquicies de xuguetes más importantes de Hasbro: Transformers y G.I. Joe. Dos franquicies, per otra parte, que yá tienen abondes adautaciones al cine, masque la primera yá empieza a mostrar nicios claros de desgaste, mientres que la segunda nun fueron a arrancala de nueves cola olvidable Snake Eyes: G.I. Joe Origins. ¿Qué meyor manera de da-yos puxu nuevu qu’apoyando caúna na otra?
Esa ye la idea de la serie curtia Void Rivals, de la que’l primer númberu salió’l mes pasáu y col qu’abrieron la puerta al que bauticen como “Universu Energón” (energón ye’l combustible qu’usen los Transformers). Lo más llamadero ye que nun principiu paecía que’l cómic nun tenía nada que ver con esto. Los autores, el mesmu Robert Kirkman y Lorenzo De Felici, presentaben un argumentu sobre dos enemigos nuna guerra espacial qu’acaben nel mesmu planeta (al estilu de la clásica Enemy Mine). Y, no qu’abultaba ser una llicencia dafechu orixinal, lo único que los detalataba yera que poníen el sellín de Hasbro. Por embargu, agora sabemos qu’a lo callandino taben preparando dalgo gordo, y la editorial ta tresnando yá un montonáu de series qu’usen Void Rivals como arranque.
La primera ye, a cencielles, Transformers, nueva serie abierta (y qu’arranca la historia de nueves dende cero) con Daniel Warren Johnson (Extremity, Wonder Woman: Dead Earth) al guión y los dibuxos. Estrénase n’ochobre.
La segunda, Duke, ye una serie curtia que protagoniza’l personaxe de G.I. Joe del mesmu nome (y ún de los primeros moñecos en salir). Estrénase n’avientu y, nella, Joshua Williamson (Nailbiter, Dark Crisis) y Tom Reilly (Wasp, The Thing) cuéntennos l’orixe d’esta fuercia especial, dándo-y un xiru pa xuncila a los Transformers.
Por último (de momentu), otra serie curtia, Cobra Commander, va facer lo mesmo cola organización terrorista enemiga de los G.I. Joe, que va intentar aprovechar l’energón pa fines perversos. Esta estrénase yá pal añu viniente, en xineru, guionízala tamién Williamson y dibúxala Andrea Milanan (Impact Winter: Rook).
A esti movimientu hai qu’amestar, nun podemos olvidalo, la recuperación per parte de Marvel pa espublizar otres llicencies de Hasbro, tando confirmaes de momentu ROM y The Micronauts (cosa que vos contemos equí y equí). Too ello pinta bastante a que la compaña quier dar el saltu a otros medios… Y, como siempre, vamos tar informándovos.
