Iberia Inc. foi una serie curtia de superhéroes a l’americana cola peculiaridá de tar ambientada n’España. Creáronla Rafael Marín y l’apocayá fináu Carlos Pacheco, y tres d’unos años en llimbu acabó espublizándose en 1997, dempués de tar a puntu de ser parte integrante del Universu Marvel, como parte de la llinia Marvel UK (y, de fechu, llegaron a facer un cameín na serie curtia Avengers Forever).
Ye llamadero que, magar que nun suel ser lo común nes creaciones españoles, nesta representóse bastante bien la diversidá cultural de les distintes comunidaes autónomes: nel superequipu podemos atopar al superhéroe catalán Drac de Ferro, a la valenciana Traka o al gallegu Lobisome. Y, ente ellos, allugábase’l que tien l’honor de ser el primer superhéroe asturianu, Trasnu.
Naide nun sabe claro d’ónde vien Trasnu, cuente qu’hai informes dende entamos del sieglu XIX d’un ñeñu d’oreyes puntiaes que diba y volvía una y otra vegada al Orfanatu Asturcón, pos tolos que lu afiaben quedaben espantaos al ver que pasaben los años y nun crecía. Nun se sabe si ye un mutante o un trasgu verdaderu, pero a la mocedá aparentemente eterna que tien van xuncíes otres peculiaridaes: tien l’axilidá d’un saltimbanqui, un gran poder de telequinesis y una capacidá non mui controlada de transustanciación de la materia. Al ser baxín y fumador pue recordanos un poco a Wolverine, pero en verdá, pol calter cínicu, chancieru, charrán y fartón, tien un gran asemeyu a otru superhéroe de Marvel enforma menos conocíu, Pip the Troll.
Ye una pena que nun tenga un gran protagonismu na hestoria magar ser miembru del superequipu, y nun podemos dicir muncho más d’él. Podríemos suponer, o más bien imaxinar pola ene nel nome, que ye del occidente d’Asturies, pero non muncho más.
De lo que nun hai dulda ye que, pelo menos de momentu (anque esperamos que non pa muncho), ye l’únicu superhéroe asturianu. Que nun ye poco.
