La película orixinal ye nada menos que de 1960, pero la que más recuerda la xente ye’l remake de 2001. Y nun ye porque fuera mui bona, nin porque tuviera un gran ésitu en cines. Quiciabes foi’l diseñu bastante orixinal de les pantasmes lo que quedó grabado nes cabeces, que per otra parte agora se ven como mui a la moda de la época.
El casu ye qu’agora ta en desendolcu una serie de televisión que va adautar Thirteen Ghosts, y pueque seya’l formatu que meyor-y vien, porque, claro, ¿cómo vas contar la hestoria de trece pantasmes en solo una película? Quiciabes esi yera’l problema, que la personalidá de les pantasmes taba namás fundamentada na so estética.
Bono, vamos parar un momentín. Pueque teamos dando demasiaes coses por supuestes, yá que les películes nun son tan conocíes. Nelles, un coleicionista de pantasmes consigue atrapar trece y mételos nuna casa, caún nun cuartu propiu, a mou d’esposición. Pero como estes coses siempre salen mal, yá seya exhibiendo dinosaurios o pantasmes, la cosa va torcerse pronto, y les pantasmes van lliberase… lo que nun ye bona noticia pa los humanos qu’anden pehí.
Tovía nun pue empezar a rodase, pola lor de la fuelga d’actores. Tamién ta que Dark Castle ye la productora que ta trabayando nello, pero precisa’l preste de Sony porque ellos tienen el cincuenta por cientu de los drechos. Pero la cosa ta avanzada, y prueba d’ello ta que yá tenemos nomes d’implicaos, como Aaron McLane, responsable de los efeutos visuales de Fear the Walking Dead. Lo que nun ye poca cosa, yá que, como dicimos, ún de los grandes fuertes de la película última yera la estética de los espíritus.
Sobre l’argumentu, sabemos que va ser continuación direuta de la película de 2001, y tamién que quieren dedicar un episodio a caúna de les pantasmes escapaes. Vien estupendo qu’haya gran cantidá de series con trece episodios cada temporada.
Asina, pa que vos vayáis preparando, dexámosvos col avance d’esti clásicu que nun yera mui estimáu nel so momentu, pero que tien garrao fans a lo llargo de los años. Podéis velu calcando equí.
