Pueque munchos nun lo recordéis, quiciabes nin siquiera naciereis cuando salió, pero en 1992 llegó al mercáu un videoxuegu de la yá estinta desencolcadora francesa Delphine Software, y al que pocos de los que pudieron xugar nun-y garraron ciñu. Esti yera Flashback: The Quest for Identity, una aventura d’acción y plataformes, p’Amiga y MegaDrive, con un estilu a Prince of Persia y que resultaba revolucionaria, sobre manera poles sos escenes cinemátiques y ambientación. Nella poníeste na carne d’un estudiante nun futuru cyberpunk, al estilu del d’obres como Blade Runner, y que tien la mala suerte de descubrir una invasión estraterrestre. Al fuxir, el protagonista gólpiase y pierde la memoria, conque nun sabe por qué lu escuerren y nin siquiera quién ye. Si acaso nun vos suena o queréis espertar alcordances escondíes no más fondero de la mente, podéis ver un gameplay calcando equí.
Y el casu al que vien too esto ye que, anque en 1995 salió Fade to Black, que bien pue considerase una segunda parte, ye agora, depués de tantu tiempu, cuando por fin va salir, con toles lletres, Flashback 2 (pa PC, Nintendo Switch, Playstation 4 y 5 y Xbox One y Series X y S). Ye un xuegu que quier ser tremendamente fiel al orixinal, pero aportando esperiencies nueves que permite’l desendolcu de la teunoloxía dende aquella. Espérase pa payares, y anuncien, amás de la versión estándar, una serie limitada (con steelbox y banda sonora) y una de coleicionista (que vien tamién con una figura del protagonista de venti centímetros, pegates, una insignia y litografíes). Yá tenemos gameplay del xuegu nuevu (que pues ver calcando equí) y la verdá que ye ablucante la síntesis ente la imaxe clásica y l’usu de gráficos más modernos.
