Por Andrés Fernández
Hai un fieru alderique abiertu dientro de la comunidá de fans y namoraos de la obra del insigne y celebérrimu caderalgu británicu John Ronald Reuel Tolkien, alderique qu’anantes pasaba más desapercibíu, atapecíu n’escuros foros del internet, pero qu’anguaño ta más vivu que nunca pola mor de les abondoses empreses posen los güeyos na Tierra Media cola esperanza d’estruyala y sacar d’ella un nuevu Xuegu de Tronos o un spin-off col que dar el pelotazu. Y, cómo non, la comunidá LGTB tenía que tar metida metanes dicha polémica.
Ente propuesta de serie y ente proyeutu pa refacer les películes munchos nel coleutivu xulgaron, probablemente con bon criteriu, qu’ésti yera’l momentu afayadizu pa que la industria cinematográfica finare col so sistemáticu escaezu de les minoríes sexuales (y d’otros tipos tamién) y escompencipiare asina a incluyir personaxes homosexuales, bisexuales… Entamando por eses mesmes idees que tan surdiendo pa retornar a Arda a les pantalles. Por supuestu les rempuestes de los más conservadores ente los tolkiendili nun se ficieron esperar y agora, llevándose les manes a la cabeza, clamen qu’eso sedría desvirtuar dafechu la obra del escritor británicu, católicu convencíu; a lo que-yos retruquen dende l’otru llau tanto que nun hai razón nenguna pa pensar que na Tierra Media nun esistíen les persones LGTB como que’l subtestu homoeróticu ente Frodo Fardel y Sambiu Gamyi ye bien bultable y nun pue ser inoráu asina como asina. Pero ente afirmación y refutación toos olviden a dos personaxes cuya relación ye entá más susceptible a interpretaciones que la de los dos portadores del aniellu.
Dende que lleí per primer vegada la gran obra mitolóxico-fantástica que ye “El Silmarillion“ siempres sentí una gran fascinación por Túrin Turambar, l’amu del destín, la espada negra, el yelmu terrible; ún de los homes más poderosos de tola hestoria d’Arda… Y tamién pol so compañeru infatigable, Beleg Cuthalion, el gran arqueru de los elfos de Doriath.
El triste destín del fíu d’Húrin, Beleg aneciando vegada tres otra en salvalu d’esa maldita fortuna, el dolorosu fin que tienen… La so murnia relación siempres imprimió en min una gran atraición y, seique porque yá atalantaba ciertes coses, nun duldé nunca n’afondar na so hestoria nos escritos más desconocíos qu’escribiera en vida’l propiu JRR Tolkien y que-y serviríen al so fíu Cristopher pa crear “El Silmarillion“yá fináu’l so pa. Maxinen cómo de grande sedría la mio sorpresa cuando, al aportar a la versión de la muerte de Beleg qu’apaez nel segundu capítulu (“Turambar y el Foalókë“) del volumen caberu de “El Llibru de los Cuentos Escaecíos”, lleí lo siguiente:
” –Los orcos tan enriba de nós, afuxamos- pero Túrin nun retrucó… y, entoncies, Túrin fizo como-y dicíen pero siguía aturdíu y doblóse pa llevantar a Beleg y besólu nos llabios”
“The Orcs are upon us, let us flee,” but Túrin answered not…and then Túrin did as he was bid but yet as one dazed, and stooping he raised Beleg and kissed his mouth.”
Y ésta nun ye una versión pelegrina que Tolkien escribiere de manera irreflexiva y llueu desechare, non, l’autor británicu tornó a usar esta mesma escena, camudando ciertos detallinos y amestando otros, na tercer parte del poema “La Balada de los Fíos d’Húrin”, insertu en “Les Balaes de Beleriand”.
“Y besó la so boca; fría y abierta, y zarró los sos güeyos”
“… and kissed the mouth; cold and open, and closed the eyes.”
Los besos, na obra de Tolkien, son rarísimos (puen cuntase colos deos de les manes) y la so trescendencia ye capital: son la mayor amuesa d’amor románticu que vamos atopar nos sos llibros, carentes dafechu de cualesquier referencia sexual. Estes escenes nun se puen tomar a la llixera, si bien nun podemos afirmar que Túrin y Beleg tuvieren una relación in vita sua ta claro qu’había una atraición amorosa y sexual ente los dos o, polo menos, de Túrin a Beleg.
¿Por qué nun sal esta escena en El Silmarillion? Escapa a les nueses conocencies, seique foi el mesmu Tolkien quien consideró (recordemos que la homosexualidá nun foi llegal na totalidá del Reinu Xuníu hasta 1982) qu’un besu ente un elfu y un home, dambos del mesmu xéneru, nun sedría afayadizo, o quiciabes foi el so fíu; pero’l fechu de qu’apaeza non nuna sinón en dos obres estremaes abulta mui significativu y desanicia cualesquier dulda al rodiu de si procede o non incluyir personaxes LGTB nuna serie o película afitada n’Arda: les minoríes sexuales esistíen na Tierra Media.
Y, reflexonando sobro l’asuntu, paez totalmente llóxico qu’esistan, non solo dende un puntu de vista biolóxicu y mitolóxicu (Arda supuestamente ya la nuesa Tierra nuna dómina anterior, polo que los humanos de les hestories de Tolkien son iguales a nós como especie) sinón tamién dende una perspeutiva lliteraria. Tolkien nun escribió les sos obres cola idea d’escribir fantasía, escribióles cola idea d’escribir épica al xeitu y usu de les lleendes de tiempos pasaos, como los poemes homéricos, y si consideramos ésto salten a la vista los paralelismos ente personaxes creaos por Tolkien como Túrin y Beleg y otros mitolóxicos como Aquiles y Patroclu, que yeren definíos como “ερασταί” (erastai), amantes en griegu antiguu. O tamién podríemos mentar a Gilgamesh y Enkidu o a Nisu y Euríalu y a tantos otros; les pareyes heoriques ente dos homes son bien comunes na épica antigüa, que ye la principal fonte d’inspiración pa Tolkien, polo que ye llóxico que tamién les heba na Tierra Media.
Tampoco nun sabemos si Tolkien escribió “El Señor de los Aniellos” cola intención de facer un romance ente Frodo y Sambiu o si refugó d’esa intención al revisar la obra, nin tampoco nun podemos afirmar qu’heba subtestos asemeyaos n’otros binomios de personaxes; pero nun se pue negar que Túrin y Beleg (o polo menos Túrin Turambar) yeren LGTB, bisexuales nesti casu, y, como dixéremos anantes, consecuentemente abren la puerta a que nos prósimos proyeutos cinematográficos asitiaos nos mundos de John Ronald Reuel Tolkien apaezan nuevos personaxes que formen parte del coleutivu; desmontando tolos argumentos de los tolkiendili que se ñeguen a ver minoríes sexuales representaes n’Arda.
