El xuegu nuevu de moda, dempués de la fiebre por Hogwarts Legacy, llámase Atomic Heart. Esti ye un shooter, con elementos de sobrevivencia, ambientáu nuna Unión Soviética ucrónica, y nel que tenemos d’enfrentanos a robós y cyborgs descontrolaos nuna base secreta. Recuerda bastante, por si vos ayuda la referencia, a la saga Bioshock.
La polémica surde, por embargu, por dellos motivos. Per un llau, el xuegu ye d’una empresa con sede en Chipre, Mundfish, pero que s’alministra dende Rusia, y yá la tienen acusao de collechar datos privaos de los usuarios pa proporcioná-yoslos a los sos servicios d’intelixencia. Amás, la fecha de llanzamientu cuasi foi la del primer aniversariu de la Guerra de Ucraína, no que munchos nun ven una coincidencia. Y si a ello sumamos l’ambientación soviética, pa gloria del nacionalismu rusu, l’enfadu ta yá aseguráu.
El casu ye qu’agora, n’Ucraína (onde nun se distribuye’l xuegu en formatu físicu, pero nun puen evitar que se vienda de manera online), soliciten tamién a Microsoft, Sony y Valve que nun se vienda’l xuegu, non yá ehí, sinón nenyures, considerándolu propaganda rusa que romantiza un réxime sangrientu, lo qu’amás atenta escontra les lleis del país.
Esta nun ye la primer vez qu’hai una polémica d’esti tipu, nel que s’acusen los videoxuegos de ser propaganda d’un gobiernu escontra’l d’otru país. Un exemplu bastante sonáu foi’l de Glorious Mission Online, un shooter chinu nel que has protexer les isles Senkaku del exércitu xaponés… cuando estes isles son, de fechu, xaponeses, y tán en disputa d’amunchayá ente dambos dos gobiernos.
Si nun visti nada d’Atomic Heart y quies facete una opinión propia de si ye dalgo polémico o non, dexámoste un avance calcando equí.
