Tim Boucher ye un norteamericanu qu’anda rabilando con ChatGPT dende agostu del añu pasáu, bastante primero de que se punxera de moda, y pronto decidió empezar a usalo como “asistente d’escritura”. El resultáu ye qu’en nueve meses tien “escrito” nada menos noventa y siete llibrinos (de solo ente dos mil y cinco mil pallabres, cosa que nun ye especialmente rara no tocante a los ebooks). Acabar caún d’ellos lléva-y ente trés y ocho hores escribilu, y pa vendelos conviértelos en llibros ilustraos (con ente cuarenta y cientu cuarenta imáxenes) col usu d’otru programa d’intelixencia artificial: el conocíu y polémicu MidJourney, un programa de pagu y mui criticáu polos artistes porque ta “entrenáu” con imáxenes que tienen drechos d’autor.
Vendiendo los llibros na plataforma Gumroad col nome de la “editorial” Lost Books (AI Publisher), Boucher ta consiguiendo un ésitu bultable (tien ganao dos mil euros nestos nueve meses, con precios d’ente 1’99 y 3’99 euros), llamando l’atención abondo como pa que lu entrevistaren la CNN y Insider sobre’l so trabayu.
Les hestories son sobre manera de ficción científica, como The Jellyfish War (na qu’unes marmoques estraterrestres invaden la tierra) o Daughters of the Hegemon (de sensuales muyeres robótiques asesines), davezu con IAs na mesma hestoria, pero tamién de xéneru fantásticu. Son llamaderamente comunes (y quiciabes pue dicir dalgo sobre’l públicu al que van dirixíes les noveles) les que traten teoríes “conspiranoiques”, como l’efectu de los famosos chemtrails (Mysterious Chemtrails), criptozooloxía (Mysterious Bigfoot) o la esistencia de xigantes na historia recién de la humanidá (Mysterious Giants). Amás, Boucher comenta que-y gusta coneutar unos llibros con otros, nuna especie d’universos compartíos como’l de Marvel pa caltener enganchaos a los llectores. En casu de que vos interesara ver el catálogu completu, o inclusive comprar dalgún de los artículos, dexámosvos l’enllaz calcando equí.
