El Centru pola Diversidá Biolóxica ye una organización norteamericana, ensin ánimu de llucru, que busca la proteición de les especies en peligru de desaniciu. Y agora, xunto a la editorial de rol Mage Hand Press, alcontró una manera bien orixinal cola que concienciar a la xente del so llabor.
The Book of Extinction ye un proyeutu llanzáu en Kickstarter, y que consiste nun bestiariu (pa quien nun lo sepa, un compendiu de “monstruos” pa xuegos de rol) nel que cada creatura qu’apaez ta basada nuna especie yá desapaecida: el tigre dientes de sable, el páxaru dodu, la palomba migratoria o’l llobu marsupial conviértense asina n’animales máxicos que nos recuerden la guapura d’estes especies, pa facenos a la idea del valor que tienen les que queden.
Les carauterístiques de les creatures tán adautaes pa xugar con elles a la quinta edición de Dungeons & Dragons, yá que tien un sistema de regles d’usu abiertu pa que cualesquiera puea face-y y publica-y espansiones. La campaña de micromecenalgu ta siendo tou un éxitu, pos tovía queden más de trés selmanes pa qu’acabe y yá superen los 80.000 euros, cuando namás que precisaben 18.567.
Si quies participar na campaña de Kickstarter, o namás ver lo guapu que ye’l llibru, pues facelo calcando equí.
