Ye una posibilidá na que la productora ta trabayando, y polo que se ve (ye un rumor, pero del que tán faciendo ecu páxines de gran relevancia) ta habiendo yá negociaciones col direutor de películes como Inception, Interstellar o la más recién Tenet pa que lleve les riendes de la p´roxima película de James Bond (la primera n’informar d’ello foi ActioNews, y podéis lleer la noticia orixinal calcando equí). Y ye que Christopher Nolan tien dicho yá de tiempu lo fan que ye del Axente 007, cómo les sos películes influyeron na so manera de facer cine, y lo muncho que-y prestaría facer dalgo col personaxe. Eso sí, si ye asina y les negociaciones salen p’alantre va ser suyu dafechu, pos, cuenten, esixe a la productora un control total sobre’l personaxe y qu’hasta los guiones seyan suyos. Esto ye dalgo que yá consiguió cola triloxía de Batman, la otra gran franquicia a la que se dedicó, y los resultaos foron bonos pa recaldación y crítica, conque que se ponga gallu nun ye por necesidá un aspeutu insalvable.
Por embargu, la so idea sedría facer dos películes, y lo que tien preparao pal personaxe ye de magnitú tala que precisaríen d’otru reboot y cambiu d’actor pa la siguiente. Esto sí ye una torga, porque la productora quier siguir la fórmula que-y funcionó tan bien con Daniel Craig, y que consistiría en sacar pelo menos cuatro películes col mesmu actor. El que tien más papeletes pa encarnar al axente secretu más famosu del mundu, por ciertu, ye Aaron Taylor-Johnson (Kick Ass, Anna Karenina, Avengers: Age of Ultron y Kraven the Hunter), qu’amás, como yá trabayó en Tenet, Nolan conózlu de sobra.
¿Llegarán les negociaciones a dalgo? De xuru qu’ente los nuesos llectores hai fans y haters de Nolan, polo que nun nos atrevemos a dicir cuála de les dos sedría la noticia bona. Pero’l resultáu d’elles va marcar ensin dulda’l futuru de la franquicia, y por ello vamos informavos del resultáu en cuantes que se sepa.
