La nueva normalidá ta faciendo que tean volviendo les actividaes qu’impliquen un númberu significativu de xente, y una mena importante son los conciertos musicales. Con más o menos midíes de seguridá, tamos teniendo la oportunidá de volver a escuchar música en direutu y sofitar a ún de los sectores más castigaos pol aciu del coronavirus. Tuvimos dellos exemplos equí n’Asturies dientro, por exemplu, del Metrópoli Fest, o’l conciertu d’Aitana nel Centru Niemeyer n’Avilés (del que les midíes de seguridá fueron enforma irregulares). Pero ye innegable que munchos tábemos esperando por otru tipu de festivales musicales, los venceyaos al metal y al rock.
El Resurrection Fest tenía planiao facer la quinceava edición en xunetu de 2020, pero nun foi posible pola pandemia; dempués movióse a xunu de 2021, pero les restricciones nun lo fixeron posible; y agora ta too preparao pa facelu en 2022. Sicasí, la organización tuvo l’enfotu de trayer conciertos n’otru formatu, ún que respetara les midíes de seguranza y que traxera xente otra vegada al conceyu de Viveiro: asina naz el Resurrection Fest Limited 2021.
El Resurrection Fest Limited foi una versión muncho más pequeña del festival que se celebró ente’l 26 y 28 d’agostu. Fízose nel campu de fútbol de Celeiro (como’l Resurrection Fest normal), pero foi distintu no que cinca la distribución del espaciu. Esta vegada solo había un escenariu principal, y en vede tar de pie, la xente tenía que se distribuir en meses y siyes, que taben colocaes en frente l’escenariu respetando la distancia de seguridá. Amás, tol tiempu hubo vixilantes pa comprobar que se cumplieran les midíes y reñer a la xente que nun les respetaba (anque dalgún qu’otru tovía les saltó demientres nun lu miraben).
Agora vamos a lo que ye la esencia del festival: los conciertos. Entamaben a les 17:00 y finaben a les 00:00, con dellos descansos pel mediu pal montaxe del siguiente conciertu y que la xente fuera al bañu o la xente se llevantara a pasiar un poco. El festival apostó polos grupos nacionales y internacionales, y estos son los grupos que tuvieron los distintos díes:
- Xueves: Apphonic, Viva Belgrado, Bala, Angelus Apatrida y Kreator.
- Vienres: Bellako, Crisix, The Ocean, Jinjer y Eluveitie
- Sábadu: True Montains, Teksuo, Landmvrks, Destruction y While she sleeps.
Tolos grupos agradecieron enforma la oportunidá d’asistir al festival y en dellos casos de volver a tocar en direutu con públicu per primer vez desde l’aniciu de la pandemia. Tamién ficieron bromes al públicu de que taben sosos y que podíen polo menos mover los brazos. El grupu Landmvkrs hasta tocó una canción sentaos nel escenariu nes mesmes siyes y meses que’l públicu.
Hai que comentar tamién que pudimos ver nel escenariu una bona representación d’Asturies gracies a la banda de la nuesa tierra Teksuo, una de les incorporaciones d’última hora y que dexaron mui bon ambiente nel escenariu.
Esta vez nun había la zona habitual d’acampada (nin la d’al llau del recintu nin se permitía acampar nel parque de Covas). Había la opción d’agospedase nos hoteles y hostales de la zona, y tamién nel camping municipal de Viveiro (que tien unos precios perbonos).
Volviendo a lo que ye la distribución del públicu, había siete zones de meses, marcaes de la A a la G, siendo la A la zona más averada al escenariu detrás d’una zona especial pa xente con minusvalía (el festival siempre ta sollerte de que tol mundu pueda esfrutar de los conciertos sin torgues). Les meses yeren d’un mínimu de dos persones y habíales pa grupos más grandes.
Nel recintu había dos puestos que vendíen bebida y un puestu de perrinos calientes. Ye de comentar que tamién se podíen pidir pizzes per teléfonu al Galipizza. Sicasí, nun había munches opciones pa xente con problemes con dellos alerxes alimenticies o celiaquía, anque permitíen llevar comida de fuera.Amás, activaron la opción d’utilizar una aplicación que se llaman Gopick, y dende ella podíes pidir la bébora y comida a la mesa.
Dende llueu, esta versión del Resurrection Fest foi distinta a toles anteriores, pero ye d’agradecer que la organización ficiera daqué distinto y con toles midíes de seguranza. Agora solo falta esperar a que llegue 2022 y que la evolución de la pandemia permita qu’haya un Resurrection Fest ensin restricciones.