L’ésitu de La casa de papel foi talu que Netflix quixo y quier aprovechar el boom hasta lo que paez más allá de lo posible. Allargaron la serie, pa non pocos a más temporaes de pa lo que daba, ficieron una versión coreana, ta a puntu d’estrenase una pondera sobre ún de los personaxes con más ésitu ente’l públicu, Berlín… Y, agora, tienen en fornu otra serie sobre un atracu n’España, y na que repiten unos cuantos autores del atracu a la Casa de la Moneda.
Lo más llamadero d’esta miniserie nueva, Asalto al Banco Central, ye que va tar basada en fechos reales, nunos asocedíos en Barcelona el ventitrés de mayu de 1981. Que, per otru llau, resulten bastante estrambólicos: unos atracadores ficiéronse con más de doscientos refenes pa esixir que se lliberara a “cuatro héroes del ventitrés de febreru y el nuesu valiente teniente coronel Tejero”. Según el gobiernu foron delincuentes comunes, pero hai teoríes de que lo que buscaben daveres nel bancu yeren unos documentos secretos que comprometíen al gobiernu. Nun sabemos si Netflix va tirar per esta teoría, ver veremos.
Como dicíemos, y podéis ver na portada, la serie protagonícenla trés actores de La casa de papel: María Pedraza, Miguel Herrán y l’ex-boxeador Hovik Keuchkerian. Tovía nun tenemos fecha d’estrena, pero calcúlase qu’igual nun la vemos hasta dientro d’un añu.
