Ye la fin del sieglu XIX, l’entamu de la cayida del réxime de la Restauración, y nes colonies vuelven a caldiase los ánimos. Yá l’añu anterior españare en Filipines una Revolución que finare col fusilamientu d’ún de los cabezaleros más importantes del movimientu nacionaliegu naquelles islles, José Rizal, y diba dos en Cuba volvíen a garrar les armes los mambises, en rempuesta al Glayíu de Baire. L’Imperiu taba desangrándose y hasta en Puerto Rico, lleal hasta’l momentu, clamaben los pueblos pola autonomía, autonomía que’l gobiernu yera roceanu a dar, amenazando l’estallíu d’otra guerra n’hasta agora fiel colonia y por si nun fore poco ¡Cánovas muerre asesináu!
La rexente María Cristina noma a Práxedes Mateo Sagasta como presidente’l Conseyu de Ministros y ehí ye onde entama esta hestoria. Más partidariu de la negociación que de la vía armada, Sagasta cede a les peticiones autonomistes y el 25 payares de 1897 la Reina Rexenta pon la so robla nes Cartes Autonómiques de Cuba y Puerto Rico, los primeros estatutos d’España, pero ¿Solo a Cuba y Puerto Rico?
Na Península estos fechos nun pasaron desapercibíos, de fechu los federales yá llevaben años axitando a les mases, y agora, énte los socesos caberos, incluso miembros del Partíu Progresista-Fusionista y de partíos republicanos antaño centralistes entamaben a abrazar l’autonomía. Nun perdieron tampoco la oportunidá los carlistes, qu’esti mesmu añu proclamaben l’Acta de Loredán, una suerte de programa alternativu a la Restauración nel qu’afitaben los sos ideales y reconocíen los drechos forales de los reinos hispanos (incluyida Asturies, a la que queríen restituyir a la so Xunta Xeneral) y tamién el drechu a l’autonomía de les colonies. Los republicanos nun ye que se tomaren mui bien l’Acta de Loredán y la intentona carlista, pues pensaben que la descentralización yera incompatible con un réxime monárquicu, nin tampoco los carlistes tuvieron una actitú condescendiente n’especial pa con estos caberos, pero sí podemos dicir qu’hebo un intentu d’averamientu ente les dos fuercies col oxetivu común de l’autonomía.
Na seronda tardiega y entamos del hibiernu ye cuando’l movimientu entama a garrar fuercia, non solo n’Asturies, sinón tamién n’otros países (Galiza, Catalunya…), y el día 19 d’avientu dase’l pistoletazu de salida (por ciertu, esi mesmu día en 1918 ye cuando la Diputación Asturiana alcuerda les sos bases pola autonomía na campaña d’esi añu). Federales, progresistes y otros partíos republicanos formalicen l’allianza y escriben un Manifiestu Autonomista que reproducen n’El Noroeste esi mesmu día, na primer plana. “A los habitantes de Asturias” ye’l so títulu y nél dicíen coses como estes:
“La autonomía es conveniente, es necesaria, es indispensable para la prosperidad de Asturias”.
“Los pueblos, cuando han llegado a la edad viril debe considerárseles aptos para la dirección de sus negocios. Esto dice y certifica el Gobierno actual declarando mayores de edad a Cuba y Puerto Rico ¿No está Asturias por lo menos en condiciones iguales de cultura y desarrollo que nuestras Antillas? ¿Acaso es la provincia de Asturias un pueblo en embrión”.
Y nun quedaba’l manifiestu en vana pallabrería, que los sos firmantes (Ente ellos el socialista Julio César Estrada, del que yá falaremos, el gran y inmortal patriciu federal Eladio Carreño, y Isidro Carballido, actor y co-fundador, xunto con Pachín de Melás, de la Compañía Asturiana de Teatru) plantegaben nél unes bases pa una Constitución Rexonal Asturiana (básicamente un estatutu) qu’amás de proponer un conciertu económicu asturianu, un poder llexislativu asturianu dividíu en dos cámares, midíes municipalistes pa emancipar a los conceyos y, tamién, un fuerte conteníu socializante, yá que buscaben la formación d’asociaciones obreres a les qu’entregar les tierres improductives, amás de dellos servicios públiques y otres custiones.
Espublizáu’l manifiestu tuvo bastante puxu nel país y el movimientu entamó a crecer, tanto ye asina que cuando se decidió la cellebración d’un mitin autonomista en La Pola Siero (onde tradicionalmente hebo una gran presencia carlista) la villa taba exultante, enllena hasta la bandera de xente, y la comisión del mitin entró na población acompañada del xaréu de voladores y vítores, según cuenten n’El Noroeste el 27 d’avientu de 1897, segunda páxina’l periódicu. Lo que sigue ye un conxuntu d’escenes bravamente ablucantes.
Entama’l mitin con una llacuada que culminó con un brindis polos republicanos que “allí, en el corazón del reaccionarismo, sostenían enhiesta la bandera de la democracia”, amás de “pola llibertá de los pueblos”, al que siguió la llectura del siguiente poema por parte del sr. Tolívar:
“Brindo por los asturianos,
han probado ser patricios
y del orden partidarios;
que al hacerse necesarios
y con noble proceder,
siempre esclavos del deber,
abandonan sus hogares
y vierten sangre a mares
hasta morir o vencer”.
Xubieron entoncies al estráu los oradores y entamaron a falar a la balasma emocionada; nun vamos reproducir equí los discursos enteros, anque sí dalgunos cachinos pa illustrar la idea xeneral que queríen tresmitir. Falaron los oradores de la necesidá de l’autonomía, de la inxusticia que yera que-y la dieran a Puerto Rico y Cuba pero non a los pueblos peninsulares y tamién apellaron a la unión de los asturianos pa consiguir tal oxetivu al traviés de la constitución d’una Asamblea Magna Asturiana; amás, Ramón Blanco, en nome d’Eladio Carreño, que nun pudo acudir pol so delicáu estáu de salú, emponderó a los republicanos qu’a la fin abrazaben les idees autonomistes y felicitó al públicu y a la Comisión pol so esfuerciu na xera d’empancipar Asturies. Hai que mencionar tamién que parte de los sos discursos tuvieron empobinaos a los carlistes, qu’intentaron torgar el mitin.
Intervenciones pola autonomía d’Asturies
Pasamos agora a citar dalgunes de les intervenciones:
“Nosotros queremos verla grande—decía el señor Estrada—porque todo entre nosotros indica que debe serlo: nuestras montañas que se pierden en el cielo, las aguas de nuestro mar, embravecidas como pocas, parecen que gritan: ¡Libertad ¡Libertad! y hasta nuestros usos, nuestras costumbres, nuestra historia, nos impone el deber de ser libres. Hasta la clásica montera picona parece que nos dijese que nuestra inteligencia debe elevarse al cielo, o ensancharse, recogiendo los ideales del progreso.”
Julio César Estrada.
“Un amigo mio comparaba el caciquismo a un pulpo monstruoso que extiende sus tentáculos por toda la nación estrujando a los pueblos y absorbiendo su sangre. El pulpo tiene la fuerza en el centro donde radica la cabeza; para matar al pulpo hay necesidad de arrancarle la cabeza; pues bien, señores, quitando ese poder a Madrid los tentáculos del pulpo se distienden, pierden su fuerza y mueren. Eso solo lo conseguirá la autonomía. Concertémonos todos como asturianos y cuando la conquistemos habremos reivindicado el derecho que la naturaleza misma nos concede.”
Ramón Blanco
“Y ya veis, habitantes de la Pola—añadió— ya veis como estos hombres qus os han pintado como terribles anarquistas, como perturbadores sociales, vienen aquí con la paz en los labios y en el corazón, no a deciros que matéis, sino que pidáis con ellos la libertad de los pueblos, que es vuestra libertad; ya veis si seremos pacíficos que, republicanos todos, venimos al amparo de una ley y en virtud de un derecho a pedir a un gobierno monárquico que de a Asturias las libertades que dio a otros pueblos; ya veis como no han proferido gritos que os ofendan (…) Nosotros no decimos viva el rey ni la reina ni el general Fulano, porque para nosotros en este caso la verdadera reina debe ser Asturias y no queremos más rey ni general que el pueblo soberano”.
El representante d’El Noroeste, el sr. Otero
Punxo términu al mitin el sr. Sánchez Vizcaíno colos unánimemente contestaos glayíos “¡Viva Asturias! ¡Viva La Pola! ” Sobra dicir que tolos oradores recibieron los vítores y aplausos del públicu, n’especial Julio César Estrada, según mos dicen n’El Noroeste.
La campaña, que como vemos entamó con gran ésitu, siguió nel añu 1898, pero ta visto que’l destín nun ye’l mayor alliáu de la causa asturianista, porque de nueves fracasó esta intentona pola mor de la Guerra Hispano-Americana, anque ésta supón una piedra más na construcción del movimientu asturianista pre-transición, piedra na que s’amuesa de nueves la importancia de los federales.
*El periódicu El Noroeste ye fácilmente accesible al traviés de la Hemeroteca Municipal de Xixón, que tien dixitalizaos la mayoría de los sos fondos. A parte d’El Noroeste puen atopase ehí La Joven Asturias, La Prensa, La República Española, La Maniega, El Avance (el del sieglu XIX) y munchos otros.
