por Andrés Fernández
Canción de Xelu y Fueu foi una revolución dientro’l planu de la fantasía medievalista, tenemos de reconocelo, por muncho que dalgunos nun seyamos partícipes del entusiasmu xeneral que tal saga fexo espoxigar en tol mundiu. Como se suel dicir “Al César lo que ye del César y al Papa lo que ye del Papa”; nun voi ser yo quien falte a la verdá intentando facer de menos a eses noveles, pero si quiero, na midida en que me seya posible, desmitificales un tantu, pues noto que munchos colocaron al rodiu d’elles una aureola de santidá que-yos torga de criticales, al tiempu que miren penriba del costazu a otres obres, como les de JRR Tolkien, qu’obviamente tien los sos fallos, tampoco nun voi negalo (anque non pocos de los fallos, incoherencies o aspeutos a ameyorar que presenten en realidá derívense d’una mala comprensión de les mesmes, como yá dixi delles vegaes).
Pero diz el refrán “Errare humanum est” y eso ye lo que voi intentar demostrar; ye dicir, voi poner sobro la mesa dos errores, o dos aspeutos que considero difícilmente plausibles, de los llibros de GRR Martin ¿Por qué dos? Supongo que podría falar d’otres munches coses, como’l papel terciariu de la burguesía, la falta de ciudaes llibres del dominiu señorial (ye dicir, la falta de cartes puebles), el poco realista sistema llegal de Poniente (¿Ónde tán los fueros?), la homoxeneidá de los territorios feudales, el fechu de que cada palmu de tarrén seya propiedá señorial (¿Nun hai campesinos llibres?) y un llargu etcétera, pero nun quiero facer esti artículu innecesariamente llargu, bástame falar de les ordes militares de Poniente y de la custión sucesoria pa ilustrar les nociones que teo en mente.
Voi entamar primero pela Guardia Real, pues la incoherencia salta a los güeyos. Si un monarca vive un reináu pacíficu (como los hebo) o cenciellamente nun frecuenta’l campu de batalla (como tamién los hebo) ¿La guardia’l so fíu va tar compuesta por quincuaxenarios o sexaxenarios? Y anque muerran unu, dos o tres ¿Los que queden? Porque estadísticamente ye mui posible que dellos miembros de la guardia sobrevivan al rei (cosa que tamién asocedió) ¿Qué utilidá tendríen? La Guardia Real ye un cuerpu formáu por integrantes vitalicios, nun puen abandonar la Orde.Sí, el rei pue echalos, hai precedente, pero entós ¿Cúalu ye’l fin d’esi votu vitaliciu? ¿Por qué los reis de Poniente nun siguen la llóxica práutica d’escoyer ellos mesmos a los sos guardies? Na serie vemos claramente a personaxes como Sir Barristan Selmy, que nun guarda una verdadera llealtá pa colos Baratheon (o más bien Lanister) y como él pudo haber munchos otros ¿Qué utilidá tien esi votu, entrugo? Agora bien, faigamos que la Orde nun seya solo la guardia del rei, sinón tamién la guardia de la Ciudadela, o de la ciudá entera y que los sos siete guardies personales los escueya’l rei d’ente tol personal d’esa orde y agora si tenemos una institución coherente ¿Qu’un guardia yá nun ye’l que yera pola mor de la edá? Pasa a trabayu alministrativu o a entrenar a los nuevos miembros. Quitamos la posibilidá de qu’un rei tea una guardia d’ancianos y enanchamos la piscina de candidatos; amás de que-y damos al rei una fuercia personal bultable. Que siete espadachines, por mui bien que remanen la espada, escontra una balasma lo bastante grande nun puen facer nada.
Y depués vien la Guardia de la Nueche y yo vuelvo a entrugar ¿En qué taba pensando GRR Martin al escribir que l’amor ye la muerte del deber? ¿Quién nel so sanu xuiciu pue considerar qu’una banda de criminales indultaos y de bastardos que nun tienen onde caese muertos van ser medianamente útiles defendiendo’l muru? Ye una custión elemental de comprensión de la mente humana ¿Por qué lluchen los seres humanos? ¿Cuálu ye’l sentimientu que xeneralmente-yos lleva a ponese en peligru? L’amor. Un criminal común que marchó pa El Muru p’afuxir de la fueya del verdugu ¿Qué razón tien pa engarriase colos xabaces? Ye más, mui posiblemente tenga simpatíes por ellos. Y ¿Qué razón tien pa nun salir per pates en cuantes aporten los muertos? Básicamente nesi momentu tien dos opciones, quedar y morrer horriblemente o intentar escapar y arriesgase a que lu prinden (cosa non mui probable si too Poniente ta sofriendo la invasión d’un exércitu xigante de muertos vivientes que tienen como cabezaleros a seres tarrecibles y casique inmortales) ¿Qué escoyeríeis vós de ser él? Agora bien, lliberemos a los campesinos de L’Agasayu y démos-yos la responsabilidá sobro’l muru (les milicies conceyiles nun son cosa tan rara), tendríemos los meyores guardianes que podríemos desear ¿Por qué? Porque tienen una razón pola que lluchar (solo hai qu’alcordase d’Ollie), porque saben que si cai el muru son ellos los primeros que queden albentestate de lo qu’hai más alló. Si los xabaces faen una incursión, ellos son los primeros en ver les sos cases quemaes y el so ganáu muertu. Si aporten los muertos, ellos sedrán los primeros en recibilos y ¿Qué mayor garantía pa que los guardies d’El Muru nun abandonen el puestu que’l saber que son la única esperanza de les sos families? Na hestoria hai abondoses pruebes de lo que los homes y muyeres puen llegar a facer na defensa de les sos families. Si un “cuervu” tien detrás a la so muyer, a les sos fíes, a los sos pas, la so casa, la so vida hai munches más posibilidaes de que muerra defendiendo’l puestu que si ye un violador que ta ehí escapando del cuchiellu.
Y finalmente voi comentar un poco la custión sucesoria, porque anque nel conceptu ta bien plantegada, a fin de cuentes la continuidá d’una llinia familiar ye mui importante en sociedaes personalistes y autocrátiques, falla na forma porque ta enfocada nun modelu familiar mui pequeñu y zarráu. Los sobrinos esisten. Ye mui difícil qu’una familia quede ensin socesión dafechu, ye más, les guerres de socesión danse más davezu porqu’hai escesu que falta. Un rei muerre ensin fíos y los parientes engarriense ente ellos pol tronu; o más bien los intereses que tán tres esos candidatos. Lo que quiero dicir con esto ye que, por exemplu, si una familia queda ensin varones na llinia direuta de socesión el cabezaleru d’esa familia podría cenciellamente testar en favor del pariente masculín más cercanu, por exemplu Tywin podría testar nuna caña menor de la familia y nun habría peligru nengún de que’l so llegáu desapaeciere. Anque claro, equí toi suponiendo qu’heba llibertá pa testar, cosa que nun s’aclara, porque, y perdonen que me repita, el sistema llegal de Poniente ye bastante vagu.
En fin y como yá dixi Canción de Xelu y Fueu, como toles pieces lliteraries, tamién tien los sos fallos, fallos que nun-y quiten d’algamar la categoría qu’a día de güei tien, pero que deberíen confirmanos a toos, los sos fans incluyíos, aquello de que “quien tea llibre de pecáu, que tire la primera piedra”.
