La organización de l’AsturCon nun dexa de presentar, caldía, meses y autores convidaos pa esta edición nueva del alcuentru (díes 2 y 3 d’avientu nel Antiguu Institutu Xovellanos, Xixón). Na llinia, agora anuncia Velees, un alderique dedicáu n’esclusiva al xéneru d’horror.
La periodista Carolina Sarmiento, autora de la inquietante Vresno editada por Pez de Plata, ye una de les escritores invitaes. Otru de los participantes ye Lluis Aique, autor prolíficu ganador del María Josefa Canellada, y al que va unos méses-y editaron La vieya, novela qu’entemez horror y folclor y que ye ganadora del segundu Premiu Radagast. Covadonga Ballestero, profesional de cine y televisión y autora d’El verde de los zombis, ye otra de los convidaos. Y la mesa zárrala Beatriz Quintana Coro, ganadora del Enriqueta González Rubín d’esti añu y qu’estrena, xusto pal eventu, la colección de minillibros d’Orpheus dedicada a obres d’horror n’asturianu, La Güestia Delantre, cola obra Fábrica XXI.
Ún de los organizadores y l’autor de La Rexenta contra Drácula, Adrián Carbayales, modera esta mesa, pos amás tamién va tener a la venta nel puestu del alcuentru la so segunda novela, L’horror de la viesca, parte de la mesma colección d’Orpheus y que ye la primer obra d’horror cósmicu n’asturianu.
