Ente les meses d’alderique con autores que prepara l’AsturCon, ayeri la organización anunció en redes qu’una va tratar el mundu de la historieta. Asina, l’alcuentru yá trespasa les fronteres de la lliteratura y el rol que se marcara l’añu pasáu.
La mesa va moderala Xon de la Campa, qu’amás de ser ún de los organizadores de l’AsturCon ye ilustrador, escritor, y ganador del Premiu Alfonso Iglesias d’esti añu ccola BD (pos la influyencia franco-belga ye bultable) titulada Misteriu nel soterrañu.
Ente los participantes nel alderique (arriendes del públicu, que siempre pue participar nos alderiques de l’AsturCon) va acompañar a de la Campa, ente otros, Israel Álvarez, autor del cómic basáu en La Reconquista El señor de la montaña: El rapto de Adosinda, editáu pola editorial asturiana Orpheus Ediciones Clandestinas. Tamién va tar ente los invitaos Carol Medina, dibuxante d’El lejano país de los estanques, una novela gráfica acabante salir del fornu y qu’adapta la obra homónima de Lorenzo Silva. La mesa zárrala José Manuel Estébanez, divulgador lliterariu que collabora con alcuentros rellacionaos col cómic na Selmana Negra y nes Xornaes del Cómic Villa d’Avilés.
L’AsturCon va celebrase los próximos sábadu 2 y domingu 3 d’avientu nel Antiguu Institutu Xovellanos, en Xixón.
